LABING minos, $12 milyunes o P564 milyunes ang dawatong ganti ni pound-for-pound champion Manny Pacquiao sa giplanong away niini batok kang Puwrto Rican Miguel Cotto karong Nobiyembre 14 sa Las Vegas.

Tipik kini sa nasayran sa kasaligang tinubdan sa ESPN kabahin sa opisyal nga tanyag ni Top Rank boss Bob Arum ngadto kang Pacquiao.

For updates from around the country, follow Sun.Star on Twitter

Gawas sa premyo, ang lumad nga taga General Santos City makadawat sab og dakong bahin sa kita sa pay-per-view nga gituohang milyunes sab ang balor.

Si Arum nakigsabot na sa Canadian adviser ni Pacquiao nga si Michael Koncz kinsa mao nay modala sa mga dokumento kabahin sa tanyag ni Arum.

Gitakda untang moabot si Koncz dinhi sa Pilipinas ugma aron makigkita kang Pacquiao apan nausab ang plano ug nauswag ang biyahe karong umaabot nga Biyernes.

Gibutyag ni Koncz nga seguradong malipay si Pacquiao basi sa iyang nabahasan sa tanyag ni Arum ug gituohang ma-finalize na gyud ang away inig kita nila sa Pambansang Kamao.

“I’ll relay the offer to Manny when I get to the Philippines, but we’re in the same ballpark with [Arum],” matod ni Koncz ngadto sa ESPN.

Gipasabot ni Koncz nga mayo gyud ang dagan sa ilang panagsabot ni Arum hinuon di pa gyud siya makasulti nga segurado na kon dili mismo si Pacquiao ang mouyon ug mokompirnar niini.