BAYOT gidudahang gitulis dayon gipusil patay sa gidudahang tulisan kagahapon sa kaadlawon sa Brgy. Ermita, dakbayan sa Sugbo.
Usa ka dalagita ang naa sa kritikal nga kahimtang human napagan sa pagpamusil.
Apan ang suspek nga usa ka ex-convict sa kasong pagpatay ug nadakpan sa mga barangay tanod nialigar nga wa siya bayri sa biktima human siya gigamit sa lawasnong kalipay.
Ang namatay wa pa mailhi hangtod sa pagsuwat ning taho. Siya nakaangkon og usa ka samad sa kilid duol sa ilokan ug nilapos sa pikas bahin sa lawas. Ang biktima gibana-bana nga dunay gitas-ong 5’6,” kasarangan ang panglawas, pution og pamanit, gibana-bana nga kapin sa 40 anyos ang pangidaron, nagsul-ob og short pants.
Samtang ang napagan ug naigo ang ulo mao si Maryann Villegas, 15, nagpuyo sa maong dapit.
Gitumbok nga maoy namusil ug nasikop mao si Charlito Empinado, 27, usa ka estambay.
Sa pasiuna nga imbestigasyong gihimo nila ni SPO4 Alex Dacua, PO2 Edario Manatad, Jodan Batucan ug Julius Reges sa Homicide Section sa mga barangay tanod nga gitulis ang biktima ug pagkahuman gipusil sa suspek.
Nihimo og follow-up operation ang mga barangay tanod sa Ermita pinangulohan ni tanod chief Vicente Bosque sa Ermita hinungdang nasikop ang suspek.
Atol sa pasiuna nga imbestigasyon, nanghimakak si Empinado sa pasangil nga iyang gitulis ang biktima.
Siya niingon nga nagkasabot sila sa biktima sa lawasnon nga kalipay.
Apan human sa iyang gihimo, wa siya bayri sa biktima nga nikalit sa paglakaw.
Sa iyang kalagot, nikuha kini og armas ug gipusil ang biktima ginamit ang kalibre .38 nga snubnose revolver.
Ang bala nga nakaigo sa biktima nilapos sa lawas ug didto paingon sa ulo ni Villegas nga diha sa burger stall kay naghuwat nga maluto ang iyang gi-order nga hamburger.
Nisuway sa pagsibat ang suspek, apan naapsan sa mga barangay tanod.
Nabawi nila ang armas nga gigamit sa suspek sa kremin.