KUSGANON nga gipanghimakak sa bise-mayor sa lungsod sa Ronda, Sugbo ang aligasyon nga uban siya sa mga mayor mayor sa segundo distrito nga ningtapon sa kampo ni Nacionalista Party presidential candidate Senador Manny Villar.
Si Bise Mayor Mariano Blanco atol sa press conference sa Kapitolyo nikompirmar nga adunay siyay gipirmahan nga papel sa miaging semana, apan wa siya magdahom nga kadto usa diay ka manifesto.
Nipasabot si Blanco nga gipapirma siya sa maong papel sa pasumangil nga kini panawagan kang Gobernador Gwen Garcia nga mopatawag og usa ka tigum sa One Cebu Party gumikan sa padayon nga pagtibugsok sa survey ratings ni Lakas-Kampi-SMC presidential bet Gibo Teodoro.
Giasoy ni Blanco nga sa miaging semana usa ka mayor nga iyang higala nidapit kaniya sa usa ka tigom sa siyudad sa Sugbo.
Nahibulong na lang siya nga didto ang ubang mga mayor ug kandidato sa pagkamayor sa mga lungsod nga sakop sa Segundo Distrito ug uban pang kalungsoran.
Atol sa tigom nahisgutran ang update sa survey ni Teodoro ug nitumaw ang mga pangutana nganong di sila mobalhin sa kampo ni Villar.
Nitubag siya sa sugo sa lawas samtang kini gituki.
Sa iyang pagbalik, gidunol kaniya ang usa ka papel nga gipirmahan sa uban nga mga opisyal nga nanambong sa maong tigom.
Nahasuwat sa tumoy nga bahin sa papel ang panawagan sa usa ka tigom sa One Cebu. (JFT)