NAGUBOT ang gihimong clearing operation sa Squatters Prevention Elimination and Encroachment Division (Speed) sa sityo Sto. Nino, Bo.Luz kagahapon.

Kini human gisuwayan og dala sa mga sakop sa Speed ang basketball board ni Lahug barangay kapitan Mary Ann delos Santos.

Sun.Star accepts donations for victims of Typhoon Ondoy

Bitbit ang kamandoan alang sa clearing operation, gi-demolish sa Speed ang mga stall sa mga sidewalk vendor sa nahisgutang sityo kay nagbabag na sa dan.

Apan nialma ang mga residente dihang ilang nakit-ang giapil og guba ang basketball board.

Matod ni Elisa Espedillon, usa sa mga nireklamong residente, nga di angay iapil og guba ang board kay wa man kini maapil sa clearing operation.

Mga batan-on sa dapit nga maoy nangayo sa board sa miagi lang semana gikan kang delos Santos nanalipod usab kay matod pa dako og natabang kanila ang gi-donar nga board.

Matod ni Abner Redulosa, presidente sa youth organization, nga human matauri og board ang ilang basketbolan, mao na kini ang ilang gihimong kalingawan maong nalikay ang mga batan-ong sa illegal nga bisyo.

Di kini maoy unang higayon nga gipanangtang ang mga basketball board nga gidonar ni delos Santos sa mga sityo.

Gani ang mga board usab ni Jonathan Guardo sa south district gipatangtang na usab.

Pulitika maoy gitumbok nilang rason sa pagpaibot sa ilang mga board ug gihulipan sa board sa siyudad sanglit sila si delos Santos ug Guardo pareho mang manlansar pagka kongresista sa north ug south district.

Apan si Speed chief Vicente Mercado niingon nga way labot sa clearing ang basketball board.

Apan iyang giangkon nga dunay suwat si Bo.Luz kapitan Nida Cabrera nga naghangyo sa ilang buhatan nga mopahigayon og clearing operation sa mga sidewalk vendor sa ilang barangay.

Si de los Santos sa interbyu sa Sun.Star Superbalita niingon nga niadto lang Sabado niya gipataod ang basketball boards.

Iya ning gigastuhan og P19,000 gikan sa iyang bulsa, di sa pundo sa brgy. Lahug.

Nagduda siyang si Cabrera ang nag-request nga tangtangon ang boards.

Iya ning gihatag ngadto sa mga lumolupyo sa dapit nga nanghangyo kaniyang hatagan silag basketball boards.

Matod niya nga naa ra sa mga lumolupyo kon mopasaka ba silag kaso batok sa mga opisyal sa Siyudad ingon man sa barangay.

Samtang si mayoral aspirant Georgia Osmeña nakasaway ning pagpangguba sa mga basketball board nga iya sa oposisyon.

Matod ni Osmeña nga duna pay daghan ug dakong mga problema ang Siyudad nga mas angay tutokan. (CPL/REV/CARMEL LOISE MATUS-STC Intern)