MILABAW sa average nga gidaghanon sa tubig uwan ang natala sa rain catchment sa Pagasa Mactan human sa pagbunok sa uwan kagahapon sa kaadlawon.
Niabot og 32.6 millimeter ang level sa tubig uwan kagahapon sa kadlawon nga nagpasabot nga nasinati ang heavy rain fall.
Sumala pa ni weather forecaster Oscar Tabada nga ang average nga gidaghanon sa uwan moabot lang sa 25 millimeter kon adunay sunod-sunod nga pag-uwan.
"Onset of rainy season is here," pasabot ni Tabada ug gikabalak-an nga momugna kini og pagbaha sa mga low lying area, landslides ug daghang bagyo nga mosud sa Philippine areas of responsibility (PAR).
Sama sa naandan pipila ka mga balay sa sityo BRC, barangay Basak, dakbayan sa Lapu-lapu ang gisanapan sa baha kagahapon sa kadlawon.
Bisan kon aduna nay drainage plan ang siyudad, padayon gihapon masinate ang maong sitwasyon.
Matod pa ni Basak barangay kapitan Lolita Berdin nga sa usa mga culvert sa maong area nasira sa dihang gitukoran og paril sa land owner human gigamit na niini ang luna.
Aduna nay drainage nga gitukod ang kagamhanan apan di kini maka-ato sa pagpagawas sa tubig sanglit naingon sa usa ka water basin ang dapit gumikan sa kalupa niini.
Dugang pa ni Berdin nga ang Aboitiz Land, stakeholder sa Tamiya, Basak nitanyag nga mohatag og libre nga serbisyo ngadto sa mga lumolopyo pinaagi sa pag-provide og water pump nga maoy mosuyop sa napundo nga tubig baha sa area. (FVQ)