Charmaine P. Lirazan
Sun.Star Superbalita

DUNAY gitanyag nga relocation site sa Busay ang dakbayan sa Sugbo alang sa mga biktima sa sunog sa barangay Basak-San Nicolas niadtong Martes.

Kini ang giandam sa siyudad kon ugaling di makig-negotiate ang pamilya Cabarrubias nga maoy nanag-iya sa dakong luna nga gipuy-an sa mga apektadong residente.

Matod ni Basak barangay kapitan George Rama nga gitigom niya ang mga apektadong residente sa miaging gabii ug gitanyagan sa relocation site sa Busay nga mahimo nilang bayran sud sa napulo ka tuig.

Apan matod niya nga sagad sa mga residente di interesado tungod sa kalayo.

“Naa man gud diri ilang trabaho unya ang mga anak naa diri nag-eskuwela,” nagkanayon si Rama.

Hinuon padayon pang nakig-negotiate ang siyudad sa pamilyang Cabarrubias aron paliton ang kabahin sa 8,000 square meter nga luna.

Gipasabot na ni Konsehal Gerry Carillo nga ang nahitabong sunog di mahimong rason aron papahawaon na ang mga residente.

Apan matod ni Rama nga base sa iyang nadunggan way interes ang pamilyang Cabarrubias nga ibaligya ang maong luna kay bahinon man kini sa upat ka managsuon.

Dunay 38 ka mga pamilya ang giingong nagpuyo sa luna nga iya sa mga Cabarrubias.

Hinuon kadtong ubang mga residente nahimutang sa laing mga luna nga gipanag-iya sa Pagtambayayong ug Veteran’s Bank mahimo nang makabalik og tukod kay gitugtan ra silang mobalik.

Dunay walo ka mga pamilya ang naa sa Pagtambayayong samtang pito ang naa sa Veteran’s Bank nga luna.

Giasaplig ni Carillo sa mga residente nga di sila mahimong papahawaon hangtod nga way hukom ang korte sa isang-at unyang ejectment case.

Matod niya nga mahimong makatukod og balik sa ilang mga balay ang mga residente sa higayon nga mahatag na nila ang gipamalit nga mga materyales.

Gideklarar usab sa siyudad ang tulo ka mga sityo sa nahisgutang barangay nga ubos sa state of calamity aron duna silay makuhang pundo nga magamit sa pagtabang sa mga biktima.

(November 22, 2008 issue)
Write letter to the editor.Click here.