Cesafi Q'finals sugdan
Wednesday, September 8, 2010
More Sections
MAS hugot ug mas kulbahinam nga kombati ang gilaumang masaksihan karong hapon sa pagsugod sa quarter-finals sa Cebu Schools Athletic Foundation Inc. (CESAFI) sa Cebu Coliseum.
Sa premirong duwa, ang high school division no.1 team Cebu Eastern College (CEC) Dragons makigharong sa no.8 University of San Jose Recoletos (USJ-R) Baby Jaguars.
Have something to report? Tell us in text, photos or videos.
Updates on President Benigno Aquino III's presidency
Unya sa main game, ang college category no.1 University of the Visayas (UV) Green Lancers makigsangka sa no.8 University of Southern Philippines Foundation (USPF) Panthers.
Isip insentibo sa ilang pagkasulod sa top four, ang Dragons ug Green Lancers parehong naggunit og twice-to-beat nga bintaha hinungdan nga samot silang inilog batok sa ilang tagsatagsa ka kontra.
Ang Green Lancers ni coach Elmer Boy Cabahug ninghuman sa eliminasyon nga wala’y pilde sulod sa pito ka mga duwa unya ang Panthers ni coach Raul Latonio wala gyud nakatilaw og daog.
Basi niini, dakong posibilidad nga linubnganay gyud ang masaksihan sa ilang panagharong karon apan dili gyud angayang moluag bisa’g gamay ang Green Lancers.
Kahinumdoman nga sa premiro nilang sanka niadtong Agusto 14, ning-agi sab og kalisod ang Green Lancers sa nag-unang tulo ka quarters una nila nadispatsar ang Panthers, 67-59.
Ang Green Lancers magsalig og maayo nila ni Harold Cincoflores, Edrian Lao, Phil Mercader, Ralf Olivares, ug Emmanuel Calo.
Samtang ang Panthers mosandig sa abilidad nila ni Ellison Rivera, Jordan Bardilas, Randy Avila, Fritz Dajalos ug slamdunk champion Elwin Durano.
Sa ilang bahin, ang Dragons, nga maoy kulatahunon sa miaging tuig sa high school division, ninglig-on na gyud og maayo ug ilaha gyung gipangmakmak ang tanan nilang kontra gawas lang sa UV Baby Green Lancers nga maoy bugtong nakapilde kanila.
Ang Dragons ninghuman sa eliminasyon dala ang 7-1 nga rekord samtang ang ilang kontra nga Baby Jaguars adunay 2-6 nga baraha.
Sila si Roy Villarias, Nike Montalvo, James Sumayang, Benjamin Zosa, ug Raymond Sypongco mao ang mga pambato sa Dragons.
