KAY di pa man ma-ban dayon ang mga bus sa pag-agi sa Transcentral Highway kon way balaod nga pandayon, ang Cebu Provincial Police Office (CPPO) nipahigayog checkpoint nga nagdili sa mga bus ug dagkong trak nga makaagi sa dapit.
Matod ni CPPO director Erson Digal nga ang checkpoint gihimo sa iyang mga sakop nga ubos sa Balamban Police Station sugod niadtong Lunes.
Kining gihimo karon sa kapulisan sa lalawigan gitinguha aron malikayan ang samang insidente niadtong Dominggo diin ang usa ka bus nga nagkarga sa mga Iranian national nahagbong sa Sitio Buli, Barangay Cansumoroy, Balamban.
Ang aksidente nikalas og 20 ka mga Iranian ug usa ka Sugboanong drayber nga si Jaime Batoon unya niangol og 23 ka mga laing pasahero nga Iranian.
Malaumon si Digal nga mosabot ra ang mga motorista ning ilang gihimo karon kay tinguha ra man nila ang "safety" sa ilang biyahe.
Moabot sa 32.5 kilometros kining Transcentral Highway busa minos ra ang biyahe niini kon mobiya ka sa habagatang kasadpang bahin sa lalawigan sa Sugbo.
Sa samang kalambuan, ang kapulisan niumol usab og task force nga mo-establisar sa posibling tulobagon sa tag-iya sa tourist bus nga maoy gisakyan sa mga Iranian nga natagak didto sa Transcentral Highway.
Si Digal namahayag nga ang pagkaumol sa task force resulta sa kamanduan ni Police Regional Office (PRO) 7 Lani-o Nerez niadtong Lunes.
Ang grupo nga wa hatagig pangalan ni Digal pangulohan ni Senior Insp. Ruben Cuizon sa Provincial Investigation and Detective Management Branch.
Nagpahigayon nag ocular inspection sa Balamban ang grupo ni Cuizon ug niadto sa CebuDoctors University Hospital aron mokuha sa mga ngalan ug pamahayag sa mga nangaangol nga mga biktima.
Nitataw si Digal nga ang pamahayag sa mga biktima gamiton alang sa pag-establisar sa basehanan sa pagpasakag kasong civil batok sa tag-iya sa JD Tours, nga maoy operator sa bus nga gisakyan sa mga Iranian.