NASAGMUYO ang mga imbestigador sa Commission on Human Rights (CHR) dihang wa dayon pasudla sa Cosmopolitan Funeral Homes aron unta ilang masusi ang patay’ng lawas sa mga sakop sa Alvin Flores robbery group.

Kapin sa oras nga gipahuwat ang tulo ka mga human rights investigator una kini gitugtang makasud sa morgue.

Sun.Star accepts donations for victims of Typhoon Ondoy

Matod ni Primo Cadampog, chief investigator sa CHR-7, nga dunay instruction nga di bastabasta ipalili ang mga patay’ng lawas.

Hinuon wa motino ang taga punerarya kon diin gikan ang instruction.

Apan nasabtan ni Cadampog nga gikan kini sa National Bureau of Investigation (NBI) aron usab ilang masubay kon kinsay nag-interes sa pagsusi o pag-claim sa mga lawas sa mga suspek.

Hinuon human maestorya ni Cadampog si Dr. Rene Cam sa NBI-7, gipasud ra hinuon ang mga imbestigador.

Positibo sa gunpowder burns ang upat ka mga sakop sa Alvin Flores gang.

Si Flores dunay upat ka mga samad pinusilan; duha kang Salamanca ug duha kang Delania ug usa kang Hijapon.

Matod ni Cadampog nga tumong lang nila sa pagsusi mao ang pag-dokumento kon asa ug pila ang mga samad sa mga suspek kay makatabang kini pag-establisar kon rubout o shootout ang giingong engkuwentro sa Compostela nga niresulta sa kamatayon sa mga suspek.