NIPUPO’G 34 puntos si Mark Jayven Tallo aron aswaton ang Cebu Institute of Technology (CIT) Wild Kittens ngadto sa labing una niining high school division title pinaagi sa makutas nga 81-78 nga kadaugan batok sa University of San Jose Recoletos (USJ-R) Baby Jaguars kagahapon sa Game 3 sa finals series sa Cebu Schools Athletic Foundation Inc. (CESAFI) sa Cebu Coliseum.

Gikan sa sinugdanan, nanginit na gyud si Tallo ug wa gyud kini kapugngi hangtod na sa katapusang gutlo aron pangulohan ang Wild Kittens nga mahuman og sayo ang best-of-five series.

Sun.Star accepts donations for victims of Typhoon Ondoy

Pagkahuman sa duwa, naninggit na og MVP! MVP! ang mga kauban ni Tallo dihang gitawag pa lang ang iyang pangalan isip usa sa mga sakop sa Mythical Five. Tuod man, way lalis nga nakuha gyud ni Tallo ang MVP award.

Ang amahan ni Tallo nga si ex-PBA Mark Tallo, kinsa maoy consultant ug nagtabang sa coaching staff sa Wild Kittens, malipayon gyud kaayo nga nakuha nila ang titulo bisa’g napahamtangan og season ban ang tulo niya ka mga magduduwa human sa kasamok sa Game 1.

“Depensa ra gyud ang nagpadaog namo. Sa among training, mag-concentrate gyud mi sa depensa bahala na’g ma-sacrifice nang uban,” asoy sa amahan nga Tallo.

Nahisakop sa Mythical Five ang teammate ni Tallo nga si Franklyn Batiquin samtang ang uban mao sila si Clint Muñez sa USJ-R Baby Jaguars, Gerald Ampoon sa UC Baby Webmasters ug Gerald Legarde sa UV Baby Green Lancers.

Puntos kada usa:

CIT jrs (81)- Tallo 34, Batiquin 18, Limalima 11, Koino 6, Pamaong 5, Sanchez 5, Abad 2.

USJ-R jrs. (78)- Escatron 20, Munez 13, Mate 12, Senining 10, Authentico 8, Go 3, Montecillo 2.