ANG Cebu Provincial Police Office motabang na sa imbestigasyon labot sa pagpusil patay sa usa ka bodyguard ni Mayor Sonia Pua sa lungsod sa Carmen.

Kagahapon ang cartographic sketch sa mga mamumuno gisugdan na paghimo.

Sun.Star accepts donations for victims of Typhoon Ondoy

Apan ang pamilya ni retired police Nonito Taoy di pa makatino kon ang krimen may kalabotan ba sa iyang pagka-body guard sa mayor.

Niadtong Lunes sa hapon si Taoy gipusil sa upat ka mga tawo nga nagsakay og motorsiklo.

Matod pa ni CPPO Director Sr. Supt. Jesus Gaquing nga ang hepe sa lungsod nga si Senior Insp. Carlos Reyes padayon pa sa ilang hot pursuit operation.

Ila na sab nga gihimoan og cartographic sketch ang mga mamumuno nga maoy magsilbeng giya sa mga imbestigador pag-ila sa mga kriminal.

Hinuon gitataw ni Gaquing nga sa pagkakaron di pa gihapon sila makatumbok kon ang motibo sa pagpatay may kalabotan ba sa iyang trabaho isip bodyguard o sa iyang pagka pulis kaniadto.

Nasayran si Taoy gikatahong gidagit niadtong 2007 atol sa miaging eleksyon.

Gibutyag ni Gaquing nga mopadala silag mga imbestigador gikan sa provincial command aron maoy motabang sa imbestigasyon apan ubos gihapon sa pagpakig-alayon sa kapulisan sa Carmen.

Lakip sa susihon ni Gaquing kon atol sa hitabo aduna bay mga pulis nga didto sa dapit tungod kay nahitabo kini sa barangay Poblacion.

Samtang si Reyes niingon nga duha ka mga cartographic sketch ang ila karong gihimo tungod kay mao kini ang sentro sa ilang imbestigasyon pag-ila sa suspek.

Matod niya nga basi sa ilang imbestigasyon walo ka mga tawo ang nihimo sa krimen tungod kay adunay saksi nga upat ka mga motorsiklo ug matag motorsiklo adunay tag-usa ka angkas.

Sa pagkakaron, wa pa niya maestoryahe ang pamilya sa namatay tungod kay ila lang unang gihatagan og gihayon nga mahipos ang patayng lawas.  

Si Arlene Booc pag-umangkon sa namatay niingon nga silang pamilya wa pay gidudahan nga motibo sa pagpatay.

Iyang gihulagway ang iyang uyoan nga buotan, hilumon ug di tigsulti sa iyang mga problema.

Matod ni Booc nga di malikayan nga maghunahuna sila nga pagpatay sa ilang uyoan may kalabutan sa iyang pagka-body guard sa mayor o ba kaha sa iyang trabaho kaniadto isip pulis. (DRT)