TALIWA sa hulga sa mga oil companies nga magnihit ang supply sa lana, ang Department of Energy (DOE) Central Visayas niklaro nga wa silay na-monitor nga mga gas station dinhi sa Sugbo nga nahutdan og supply sa mga produktong petrolyo.

Kini tungod kay matod ni Dir. Antonio Labios nga wa pa maghurot ang supply sa mga petrolyo tibuok nasod.

Sun.Star accepts donations for victims of Typhoon Ondoy

Giklaro ni Labios nga ang gipahibawo lang sa mga oil companies nga nagkuwang ang ilang stock sa petrolyo sanglit wa na mo-import og krudo ang mga oil companies ilabina na ang mga small oil players.

Apan bisan kon mahurot ang stock sa petrolyo, matod ni Labios nga di pa dihadiha mahutdan og lana kay duna pa may naka-stock nga krudo nga maoy i-refine aron mahimong produktong petrulyo.

Nihunong ang ubang mga oil companies pag-import og krudo tungod sa gipatumang price freeze ni Pres. Arroyo sa Luzon mao nga maalkansi gyud sila sanglit di man nila mabaligya sa saktong presyo ang ilang mga produkto.

Samtang hugot usab nga nag-monitor karon ang Department of Trade and Industry (DTI) sa mga presyo sa nag-unang palaliton.

Kini tungod kay posibleng dunay epekto sa presyo sa basic commodities ang hulga sa pagnihit sa supply sa petrulyo kay mao kini ang usa sa mga basehanan sa pagsaka sa presyo sa mga palaliton.

Apan matod ni Zaide Bation, hepe sa price monitoring division sa DTI-Cebu nga stable ug nagpabilin rang sama sa nangaging semana ang presyo sa mga basic commodities karong semanaha.

Gani bisan human niadtong sunodsunod nga bagyo, matod ni Bation nga wa mosaka ang presyo dinhi sa Sugbo.

Masaligon usab ang DTI nga mas moubos pa hinuon ang presyo sa umaabot nga mga adlaw kay matod ni Bation daghang mga promo ang itanyag sa mga tindahan ning nagsingabot nga Pasko. (CPL)