Undo Tabian
Sa biya, Sa inilog

NADAWAT nako ang text message gikan sa Gallera de Mandaue nga nagtaho sa dakong stag derby sa maong buwangan ning umaabot nga buwan sa Nobiyembre. Adto sa San Juan Coliseum, Metro Manila ang championship round sa maong derby nga gitawag ug “Rambulan 2009 Nine Stag Derby”. Ang kantidad nga gigarantiyang bahinbahinon sa mga entries nga adunay suwerte P35 milyunes, ang mo-champion makadawat P17M.

Ingon sa gidak-on sa madawat niadtong mga modaog, P11,000 lang pot money. Sa ato kinsa kadto nga adunay siyam ka mga stag nga isalmot, mao ra kana ang kantidad sa puhonan, apan minilyon ang madawat kon adunay suwerte. Kadtong dunay 8 puntos, makadawat P8M, ang makakuha ug 7 puntos, P2.5M; 6 puntos, P3.5M; 5 puntos, P5M. Ang handler dunay bahin nga P1.5M, samtang ang gaffer adunay P750 ka libo.

"The Manny Pacquiao Blog". Click here for stories and updates on the Filipino boxing champ.

Ang maong stag derby, sigon pa sa text message, magsugod sa Nobiyembre 20 diin pagahimuon ang unang 3-stag elimination round. Ug sa pagkaingon ugma, Nobiyembre 21, ang ikaduhang 3-stag elimination round. Sa Nobiyembre 27, gieskedyol ang 3-stag semifinals. Ug sa pagkaingon ugma, Nobiyembre 28, ang 3-stag insurance round, alang niadtong mga entries nga adunay 2 ka puntos ngadto sa 4.5 ka puntos.

Ang championship round, alang niadtong mga entries nga nakakuha ug 5 ngadto sa 6 ka puntos, adto na pagahimuon sa San Juan, Metro Manila unya sa Disyembre 12.

Kadtong ma entries nga nakalusot sa elimination round dinhi sa Sugbo makadawat na ug ma prebilihiyo, sama sa nangagi nga mga derby diin ang championship round didto ipahiluna sa San Juan, mga prebilihiyo sama sa tiket sa ayroplano, libreng hotel, ug uban pa.

Sa miaging panahon, ang stag derby dinhi ra gyud himoa sa Sugbo. Unya, ginagmay ra ang pot money ug premyo. Maabot ra sa kasagarang mga breeder. Hinumdomi nga ang unang stag derby dinhi sa Sugbo gipasiugdahan sa Cebu Gamecock Breeders and Cockers Association. Ang maong kapunongan, hangtod karon nagpasiguda gihapon sa tinuig nga stag derby, matag Oktubre ug ang clean-up derby sa Disyembre.

Dako kaayo ang kausaban karon sa maong matang sa bowang tungod kay gisudlan man sa GDM, kinsa ang nagdala niini arisgado kaayo nga mipahiluna sa dinagko nga mga premyo. Di tiaw ang minilyon nga madaog sa mga entries nga dibuynas kay ilaha ang P17 milyunes nga premyo sa champion. Asa ka mangita karon nianang kantidara?

Ang maong matang sa derby usa sa mga nagpalambo sa atong industriya sa turismo din sa Sugbo. Ang Sugbo karon usa sa mga lalawigan nga giilang hingpit nga tinubdan sa malabuong ekonomiya sa turismo sa nasod. Ang mga negusyo nga milambo gikan sa pamowang, nakahatag ug maligdong panginabuhi sa daghang mga way trabaho.