NIDIKLARAR na og dengue outbreak ang Cebu City Health Department tungod sa padayong pagsaka sa mga kaso sa dengue sa 25 ka mga barangay ning dakbayan.
Si Cebu City Mayor Michael Rama nidiklarar usab og state of calamity aron magamit ang pondo sa siyudad pagpugong sa paspas nga pagdaghan sa mga nangasakit niini.
Ang Cebu City Medical Center nangandam na sa posibleng pagdagsa sa mga nagka-dengue.
Kagahapon, personal nga gisusi ni Rama ang kahimtang sa mga pasyente sud sa tambalanan labi na sa pedia ward diin daghang mga bata ang nangahilandig gumikan sa maong sakit.
Kapin na sa 20 ka mga pasyente ang naa sa pedia ward ug niadtong Lunes napugos ang tambalanan paggamit sa auditorium niini tungod sa pag-abot-abot sa mga natakboyan sa maong sakit.
Base sa datos sa City Epidemiology Statistics and Surveillance Unit, miabot na og 1,642 ang mga kaso sa dengue sa siyudad gikan sa Enero hangtod sa Hulyo 14, 2012.
Misaka ni og 106.29 porsiyento kon itandi sa 796 ka mga kaso sa susamang panahon sa miaging tuig.
Pito na ang nangamatay sa maong balati-an karong tuiga kon itandi sa walo niadtong 2011.
Kadaghanan sa mga nataptap kay mga bata.
Ang Barangay Guadalupe maoy nag-una sa mga barangay sa siyudad nga dunay labing daghang mga kaso sa dengue nga nitala ang tanan og 154.
Nagsunod ang Bacayan ug Lahug, 79; Kamputhaw, 75; Inayawan, 74; Basak San Nicolas ug Tisa, 65; Labangon, 63; Sambag I, 57; ug Mabolo, 51.
Apil sa dunay daghang mga dengue cases ang Apas, 41; Capitol Site, 38; Talamban, 36; Punta Princesa, 35; Mambaling, 33; Pasil, 32; Bulacao, Kalunasan ug Ermita, 28; Sambag 2 ug San Nicolas, 27; Tejero, 26; Bo. Luz ug Suba, 25; Calamba, Cogon Ramos ug Pardo, 24.