DepEd mipahimangno sa mga titser sa amutan

Monday, March 15, 2010

DUHA ka mga semana na lang ang nahibilin sa di pa motapos ang klase sa elementary ug high school, ang Department of Education (DepEd) nipasidaan sa mga magtutudlo nga di gyud mangayo og bayad sa graduation.

Si DepEd Regional Director Recaredo Borgonia niingon nga kon duna may himuong kontribusyon, kinahanglang nasabutan kini sa Parents Teachers Community Association (PTCA) kon pila apan di gihapon kini ikonsiderar nga compulsory o requirement sa graduation.

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

“Di mahimong i-compulsory na. Kon naay tinun-an nga di makabayad, di na himuong rason aron di siya ka-graduate” nagkanayon si Borgonia sa interview sa Sun.Star Superbalita.

Kinahanglan usab nga ang koleksyon sa kontribusyon himuon sa PTCA ug di gyud ang maestra maoy mokolekta niini.

Alang niadtong dunay reklamo sa bayranan, matod ni Borgonia nga mahimong mangayo sila og resibo aron duna silay ikapakita nga ebidensiya alang sa himuon unyang imbestigasyon.

Apil sa giklaro ni Borgonia mao ang wa na pag-require sa mga tinun-an nga mosuot og toga.

Hinuon mag-agad ra gihapon ang pagpasuot og toga kon kini maoy nasabutan sa PTCA.

Kon di magsuot og toga, matod ni Borgonia nga mahimo rang uniform o presentableng sinena ang gamiton.

Apil sa giluwatang pasidaan ni Borgonia ngadto sa mga tunghaan mao ang paglikay nga moimbitar og mga pulitiko gawas nalang sa mga incumbent official.

Kini gitumong aron di masagulan og politika ang closing ceremony sa mga tinun-an.

“Kinahanglang ma-maintain nato ang solemnity sa graduation kay kon pulitiko atong guest speaker unya iyang gamiton ang okasyon pagbira sa iyang kontra, mawa ang spirit sa ceremony,” pasabot pa ni Borgonia.

Ang maong mga pasidaan nalatid na sa giluwatang mga memorandum circular apan subli kining gipadangat ni Borgonia ngadto sa tanang mga division aron usab mapahinumdoman ang mga tunghaan.

Gilatid ni Borgonia nga ang closing sa mga tunghaan ubos sa DepEd 7 himuon karong Marso 29 ngadto na sa Abril 9.(FVQ)