Drayber gitipi sa 2 ka tinun-an; suspek nasikop

Saturday, February 6, 2010

USA ka taxi drayber gitulis ug gipatay sa duha ka mga estudyante kagahapon sa pasado ala 1 sa kaadlawon sa may mga eskina sa Fulton ug Wright Brother sa brgy. Apas, dakbayan sa Sugbo.

Usa sa mga suspek ang samdan ug naospital human gibawsan pagdunggab sa samaron nga drayber.

Have something to report? Tell us in text, photos or videos.

Click here for stories and updates on the Sinulog 2010 Festival.

Nagtulod-tulod sab silang duha kon kinsay nidunggab kang Roel Sago, 38, taga San Isidro, Siyudad sa Talisay.

Si Sago, kinsa nagbilin sa iyang asawa og lima ka mga anak, namatay tungod sa mga samad dinunggaban sa iyang lusong-lusong, liog, wa nga kamot ug buko-buko.

Samtang ang gidudahan nga nitulis kaniya ug nadunggaban usab giila nga si Art (tinuod ngan gipugngan kay menor), 16, taga Sentro, Mandaue city, tinun-an 2nd year high school.

Ang nadakpan sa follow-up sa kapulisan mao si Julian Kent Paca, 18, taga Barangay Kasambagan, siyudad sa Sugbo, tinun-an sa 1st year college sa kursong Information Technology (IT) ning dakbayan.

Sa pasiuna nga imbestigasyon gihimo nila ni SPO3 Rey Cuyos ug mga kauban sa Homicide Section nagbutyag nga gikan sa inom ang mga suspek dihang ningsakay kang Sago.

Pag-abot sa maong lugar, gitulis ang biktima ug gidunggab.

Ang drayber nga nasamdan nagsigi og sirbato sa iyang sakyanan hangtod nga nakahatag og pagtagad sa mga tawo nga namuyo sa dapit nga maoy ningtawag sa kapulisan.

Atol sa gihimong follow-up sa kapulisan, nasikop si Paca samtang si Art gidala sa tambalanan.

Si Paca sa iyang bahin nibutyag nga si Art maoy nitulis ug nidunggab kang Sago.

Siya nialigar nga igo lang siya nga niuban kang Art sa pag-inom-inom, hangtod nga nakahukom sila sa pagsuroy sa balay sa ilang higala sa Apas.

Apan sa pag-abot sa maong lugar, kalit nga nibunot og kutsilyo si Art ug nitulis kang Sago dayong dunggab sa biktima.

Matod ni Paca nga mihunong ang sakyanan hinungdan nga dali niyang giablihan ang pultahan sa front seat ug nidagan siya palayo sa lugar.

Apan si Art nga niluwat ug inisyal nga inpormasyon, nitumbok usab kang Paca nga maoy nitulis ug nidunggab sa drayber. (JFT)