DUNAY saksi ang kapulisan sa lalawigan sa Sugbo nga gihuptan nga magmatuod nga namugos si Talisay City Mayor Socrates Fernandez sa pagsulod sa sakyanan sa iyang anak bisan kon gi-hold kini sa kapulisan.
Kini maoy gibutyag ni Sr. Insp. Rubin Cuizon, hepe sa Provincial Investigation and Detective Management Branch (PIDMB), human sa ilang gipahigayong ocular inspection sa lugar.
Matod ni Cuizon nga ang testigos didto nila nakuha sa shop diin gipa-repair ni Joavan ang sakyanan human sa giingong iyang pagtion kang Vincent Castrodes.
Sa pagkakaron, giandam na sa kapulisan ang ilang affidavit alang sa kasong obstruction of justice nga ipasaka batok kang Mayor Fernandez.
Apan ang mayor wa mahadlok ning plano sa kapulisan pagkiha batok kaniya.
Matod ni Fernandez nga duna siyay katungod sa pagsud sa sakyanan kay siya ang nanag-iya niini.
Sumala pa ni Cuizon nga duna silay igong ebedensya batok sa mayor apan di lang una nila ikatug-an ang ngalan niini.
Hinuon ang ilang testigos wala makakita sa gikuha nga bag sa mayor didto sulod sa sakyanan.
Sa sayo pa, nitumaw ang mga pagduda nga armas ang sud sa bag.
Apan sa pag-inspection na sa kapulisan sa sakyanan ni Joavan, ilang napalgan ang armas sa sud.
Busa nitumaw ang lainlain na sab nga mga hungihong kon unsa gyuy sud sa bag.
Nakatilaw ang kasaba ang kapulisan sa Talisay City sa Police Regional Office (PRO-7) tungod sa mao nga hitabo.
Samtang si Sr. Supt. Erson Digal, director sa kapulisan sa lalawigan sa Sugbu, daling nimando kagahpon sa buntag kang Supt. Elmer Lim, hepe sa Talisay Police Station, nga di magpadala sa bisan unsang hangyo sa mayor labot sa sakyanan.
Kini maoy kamanduan ni Digal human si Mayor Fernadez nihangyo kang Lim nga kuhaon ang iyang sakyanan nga Isuzu Bighorn YEZ-460.
Matod pa ni Digal nga di mamahimong i-release nila ang sakyanan hangtod way kamandoan gikan sa korte sanglit kabahin sa ilang mga ibedensya nga gipasaka batok kang Joavan ingon man sa kaso unya sa mayor.
Gihagit ni Digal ang mayor nga motug-an sa tinuod kon unsay sulod sa bag nga iyang gikuha sa sakyanan sanglit nagduda sila sa kapulisan nga duna gyoy illegal nga sulod niini.
Subay niini, gitinguha karon nila nga kon manion na usab pag-usab si Joavan human makapiyansa moduso silag petition ngadto sa korte nga ipa-revoke ang piyansa niini.
Naglaraw usab ang kapulisan nga mosang-at og petition sa korte aron hinginlan si Joavan diha sa dakbayan sa Talisay.