Durano: Atras abante

Thursday, September 2, 2010

NING paghinayon gyud sa pagpahigayun sa Barangay and Sanguniang Kabataan Elections karung umaabot Oktubre 25, maoy gipahibawo ni Commission on Elections Chairman Jose Melo nga mobalik kita sa sistemang manu-mano ug dili lang usa gamiton ang teknolohiya sa Automated Elections kay gastuso kaayo kini unya dili susama sa national ug local elections, simple ra man kaayo ang piniliay sa hut-ong sa barangay mao nga angayan ug matarong lamang nga magdaginot lang una kita.

Angay natong hinumduman nga ang pundasyun ug istruktura sa atong sistema sa pangobyerno nagasubay sa konsepto nga ang awtoridad ug gahum sa mga nangatungdanan nagasukad sa kabubut-on sa katawhan. Hinungdan nga ang eleksyon maisip nga unang haligi sa Republika nga dili angayang tihik-tihikan.

Have something to report? Tell us in text, photos or videos.

Updates on President Benigno Aquino III's presidency

Pwerteng buwa sa baba sa panghambog sa mga taga Comelec sa nila pa, malampusong pagpahigayun sa poll automation sa miaging presidential elections. Apan sukwahi sa ilang pamurit, naputos og nalimin sa problema ang maong eleksyun nga miresulta sa grabeng kapurhisyo og kahasul sa publiko. Nga kun dili pa sa kabubut-on sa katawhan nga mosakripisyo tungod kay napuno na sa kabuang ug kayabag sa atong pangobyerno, posibleng magka failure of elections pa niadtong higayuna.

Ang dako nga pangutana, nahatagan na ba og solusyon sa Comelec kining maong problema?

O mao kini ang hinungdan nganong ilang dad-on ug ganuyon ang katawhan sa laing palusot sa katarungan nga angayang magdaginot kita karuo kay gamay nalang og sulod nga pundo ang atong panudlanan.

Tungod sa election automation nahimong paspas ug kasaligan ang resulta sa milabayng piniliay. Kon mao kini ang bag-ong direksyun nga atong pagasubayon, unsa mang matanga sa baliw kining gihimo sa mga lideres karun sa Comelec ning ilang gibahug nga putahi alang sa barangay ug SK Elections nga atras abante?

Hasul ug malisod matud pa ang pag-imprenta sa balota sa automated kumparar sa manu-mano kay ang nauna kinahanglan og piho og ensaktong mga detalye sa porma samtang ang naulahi pwede rang gamitan og blanko nga porma kay ang botante naman ang mo “fill in the blanks” sa ngalan sa iyang napili nga mga kandidato. Ning maong matang sa palusot, atong ibalik kanila ang lohika nga buslot. Kon trabaho man kaha ang ilang tuyo nganong naglingkod sila karon sa ilang buhatan, nganong mangita man og sayun kining mga kanahan?

Ang barangay bisan sa iyang kagamay maisip nga basic foundation sa atong nasudnong panga-gamhanan. Hinungdan nga ang mentalidad nga nagpakamenos lamang niini, susama da nga nakamenos usab sa katungod ug gahom sa katawhan. Ang atras abante nga sistema sa Comelec sa pagpahigayon sa eleksyon dili magdala sa nasod sa kalambuan kon dili magtukmod kini kanato sa kaalautan ug pagkawalay padulngan. Tungod lamang ning mga tawo nga gusto kaayong mohupot og puder apan disgustong moserbisyo ug mangatungdanan.