Durano: Daog sa abiba, pilde sa pusta

Sunday, March 14, 2010

BISAN pa man sa naangkon nga kadaugan ni Manny Pacman Pacquiao batok kang Joshua Clottey pinaagi sa unanimous decision, daghan gihapon sa mga Pinoy ang nahuyhoy ang mga abaga kay ang kinabag-an nag-atang man gyud og impresibong knock-out nga kalampusan sa ilang idolo.

Apan mas labing nanglipaghong ang mga sugarol kinsa nilunod sa ilang kuwarta bisan og dako kaayo ang lugro. Unya nasiyakoy gihapon ang pusta bisan og si Pacman nidaug pa, kay ang pusta-anay dili man sa mudaog kon dili sa unsa nga round molukapa ang kontra.

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

Garbo sab hinuon gihapon natong mga Pinoy ang maong kalampusan ni Pacquiao kay sa atong gipahigayong live coverage sa dyRF Radyo Fuerza, 1215 KHZ AM pinaagi sa pagpada sa sports reporter nga si Daniel Guden didto mismo sa Dallas Cowboy Stadium sa Arlington, Texas, USA. Mismong mga reporters sa Africa, niila man kang Pacquiao nga “Best, Pound-for-Pound” Boxer of the World, human nila masaksihi ang away.

Kining maong kadaugan ni Pacman lain na usab nga testamento nga dili kita maiwit nga mga Pilipino sa bisan unsa nga natad sa disiplina bisan og makigbangga pa sa tanang kanasuran sa kalibutan. Kini kon ugaling gustuhon ug buhaton lang gyud nato ang atong gustong kab-uton isip usa ka nasyun og di mag-iyahay sa pagluwas sa kaugalingun.

Ang pag-alburoto sa mga sugarol nga nidaog sa abiba apan pilde sa pusta, usa usab sa sayop nga kinaiya natong mga Pinoy nga angayan ng atong usbon kay kasagaran sa atong katawhan ang gusto kaayo og instant nga grasya ug dili na gustong maghago pa.

Ang atong pagsuporta kang Pacquaio nagsukad unta sa atong paghatag og bili sa pag-isa na nasudnong garbo isip usa ka Pilipino, dili kay sama sa tigbakay sa manok, ang atong gusto mao ang shortcut nga matang sa pang-warta nga imbis moganansya, hurot na gyud hinuon kapusoy ang kwarta sa bulsa gikan sa kaatbang nga magpabiling nagbarog gihapon ang mga tiil ug wala nitikangkang. Taliwa sa atong kalipay ning atong naangkon nga kalamposan, diha sa kadaugan ni Pacman.

Kita usab unta dili lang kutob sa abiba, kun dili magbaton unta og igong kaisug og kusog ang matag usa, nga mopili sa ensakto ug makigbatok sa sayop aron mo-asenso na kining atong nasod.