Durano: Dulom nga dalan

Sunday, March 21, 2010

SA pag-andam og lamiang putahi sa sud-an, gikinahanglan nga malunod sa kaldero ang tanang mga sangkap og ingredyente inubanan sa tukmang giiniton sa kalayo arun makab-ot ang perpektong pagkaluto nga adunay talagsaong kalami nga mao usay damgo og mithi sa matag manlutuay.

Pipila na lamang ka mga adlaw sa dili pa ang eleksyon, nasaksihan sa katawhang Pilipinhon ang hinay-hinay nga paglunod sa administrasyon sa mga ingredyente alang sa usa ka kulbahinam nga putahi. Una ang problema sa “power supply” nga giduyugan sa El Nino.

Have something to report? Tell us in text, photos or videos.

Click here for Election 2010 updates

Ikaduha ang bag-ong sistema og pamaagi sa eleksyon gamit ang PCOS (Precinct Count Optical Scan) machines.

Ikatulo, ang pagtudlo sa sipsip nga Lt. General Delfin Bangit isip chief of staff of the Armed Forces bisan og daghang mas senior officers pa ang angayan apan gipangyatakan.

Ika-upat, ang paglansang sa Korte Suprema pinaagi sa pagtudlo og Midnight Chief Justice nga maoy mangulo sa iyang mga tinudlong mga mahistrado kansang mga liog og mga konsensiya ang hiniktan nas kagaw sa utang kabubut-on og pamuyboy.

Ning bag-o, nipagawas og pahimangno ang Malakanyang nga kun adunay “failure of elections” possible nga ang mo-ilug sa renda sa pangobyerno mao ang usa ka military junta. Unya nagdumili usab pagtin-aw ang Pangulong nasud Gloria Macapagal Arroyo kun andam ba siyang mohupot sa temporaryong kapasidad sa iyang katungdanan kun mahitabo ang maong failure of elections o iya kining balibaran?

Imbis moklaru nga dili siya kay kini nagasupak nas Konstitusyon kay kutob ra man gyud unta siya sa Hunyo 30. Apan mao naman hinooy gipasiatab nga kining maong isyu mag-agad na unya kun unsay interpetasyun sa Batakang Balaud.

Sa hinay, misiwil na ang sungay ning maong yawan-ong biyahe nga magdala sa nasud og sa katawhan sa dulom nga dalan. Kay ang interpreter of the constitution mao man ang Korte Suprema nga hiniktan usab ang liog. Hinungdan nga bisan og karun pa lang daan, ang katawhan makapanag-an ng daan og unsay atong padulngan kun kining maong kabuang og pagsalimuang nga nanghitabo nas atong atubangan, atong paundayunan.

“WALKING TIME BOMB”

Sa padayon nga pagpangayo sa prosekusyon ngadto sa Korte sa pagtangtang sa piyansa ni PBMA Supreme Master Ruben Ecleo Jr., gikinahanglang ipabarog ang medical fact nga dili tinuod nga masakiton ang akusado pinaagi sa mas kasaligan pa nga mga eksperto ug dili kay igo lang basihan ang suposisyon nga kay nidagan kini sa pagka-kongresista sa Dinagat, Surigao Del Norte anaa kini sa maayong kondisyon sa panglawas.

Mahimo usab nga mo-insistir nga ipadayun ang operasyun sa Heart Bypass arun matangtang ang timebomb? Og pagkahuman mahimo ng ibalik sa bilanguan. Apan bisan pa gani kini wala gihapoy kaseguruan kay mahimo naman sang moingun si Ecleo og ang iyang mga abogado nga dili malampuson ang iyang operasyon. Mao kini ang hinungdan nganong imbis langayun, angayan na gyung tiwasan na ang pagsubmitir ning maong kaso sa pagdesisyon aron hingpit ng makab-ot ang hustisya.