Durano: Lain-laing dagway sa agalon

Thursday, April 29, 2010

ANG demokrasya mao man ang sistema sa panggobyerno nga naa nagasukad sa kabubut-on sa kinabag-an sa katawhan. Sa matag eleksyon dinhi sa ato usa na ka kumon nga talan-awon ang pagpangangkon sa mga politiko nga sila gikan sa banay sa mga kabos ug timawa bisan pa og sila gikan sa buena familia unya nagligid sa luho nga panginabuhi nga wala gyud makatilaw sa kalisdanan sa mga kabus.

Click here for Election 2010 updates

Have something to report? Tell us in text, photos or videos.

Kasagaran sab sa mga plataporma de gobyerno anaa nagasentro sa pagbuntog sa problema sa kawad-on sa nasod, apan kining maong matang sa propaganda maayo lamang panahon sa kampanya apan sa higayon nga makalingkod nas katungdanan, palpak kini. Sa gihapon magpadayon ang pag-antos ug ang kalbaryo sa katawhan samtang ang mga kintahay alagad nga magsilbe sa mga kabus ang padayon sa ilang luhong pagpakabuhi.

Ning mao sab nga pamaagi, mas sayon da sa mga bentahusong politiko ang pagtunto sa mga botante. Kay ang mga botanteng gutom dili lang mawad-an sa saktong panghuna-huna mugna sa pagpunay nga pagkapasmo, kon dili apil sab niini ang pagkawagtang sa delicadeza ug respeto sa ilang kaugalingon. Hinungdan nga sa gamay nga kantidad, ang mga pumipiling gutom dili na makapaabot nga silay hayluon kon tagpila ang presyo sa ilang boto kon dili ang katawhan na mismo’y mangita og hain na ang kwarta gikan sa mga pulitiko tungod sa naghilab nga mga tiyan. Dili lang boto ang andam nilang pabayluan, hasta pa gani ang unod ug kalag ang andam ibaligya. Matambalan lang bisan sa hamubo nga gutlo ang gihambin nga mga pag-antos.

Ang nakaparat kay sa atong kahimtang karon, ang kinabag-an sa atong mga pumipili ang ania ning maong matanga sa sitwasyun. Mao nga alang kanila ang eleksyon isip usa ka mekanismo sa demokrasya magahatag unta og tinud-anay nga kahigayunan sa kausaban sa pag-alibyo sa ilang kinabuhi apan human sa pipila ka mga kapakyasan sa mga saad nga wa gyuy katumanan.

Ang matag eleksyon nahisusama da sa estorya sa usa ka kabayo nga gikargahan og pwerteng daghanang palas-unon sa iyang agalon ug sa dihang ilang nasigpatan nga sila gigukod nas mga tulisan, pwerteng lisanga sa iyang amo ug wa nay puas sa paglapdos ug paghangyo sa iyang kabayo nga paspasan pa ang pagdagan kay tingali og sila hi-apsan sa mga nagukod nga mga tulisan.

Tungod kay kini estorya man, ang kabayo nangutana ngadto sa iyang amo nga kon sila madakpan sa mga tulisan, papas-anon ba gihapon siya og bug-at nga mga butang ug kanunayng lapdusan ug sigeng hipasmuhan? Tungod kay wa man makatubag ang agalon, ang kabayo mihukom nga ang ilang pagkasikop sa mga tulisan dili mag-usab sa iyang kahimtang ug ang bugtong kausaban da nga ikahatag niini kaniya mao ang pagtawag sa iyang agalon sa lahi na nga ngalan. Mao usab kini ang dagway sa atong piniliay diin way nakitang tinud-anay nga kausaban ang mga kabus, gawas sa pag-tawag sa mga halangdon sa lahi na nga ngalan.