HUMAN nibatikos sa mga political parties sa nasud, si Senador Chiz Escudero ang mipabuto na usab og laing bomba sa pag akusar kani-lang tanang mga nangatung-danan sa gobyerno nga pulos makasasala. Kay niya pa, ning duwa sa pulitika wala nay nahibiling anghel ug santos nga mga pulitiko.

Nakapasuko pagmaayo sa Simbahang Katoliko kining maong pagkumpisal ni Escudero kay lagi kini usa ka lahap nga pamahayag nga walay igong sukaranan. Apan imbis nga piyungon nato ang atong mga mata sa tinud-anay nga kahimtang ning atong pangobyerno, maayo tingaling atong subayon ang tinud-anay nga hinungdan
nganong ang buhis sa katawhan dili naman mahibalik isip serbisyo kung dili anaa naman mahipunta sa bulsa sa mga tigpahimulos nga mga kawatan.

Sun.Star accepts donations for victims of Typhoon Ondoy

Sa iyang bahin, kon tinud-anay si Escudero sa iyang krusada sa pagpangita og lunsay nga reporma, dili lang unta kining maong mga “motherhood statements” ang iyang
mga pagabuhaton, hinunua angayang iyang sugdan ang pagyagyag sa mga kabuang sa mga pulitikong sungayan nga iyang nailhan nga maoy iyang sukaranan sa iyang pag-angkon nga wa nay anghel ug santos kanilang tanan.

Dili paigo ang istilo nga kutob sa paukyab lamang og walay buhat nga gihimo aron sa pagkab-ot og tinud-anay nga kasulbaran. Apan ang mas paet nga kamatuuran, unsaon man niya sa pagpuo ning maong mga yawa og mga demonyo nga nagyaka sa atong mga ahensya sa gobyerno? nga sa iya mismong lohika nahiapil naman siya sa ilang linyada. Mao nga dili ikahibulong ang katumanan sa panganti ni kanhi Presidenti Manuel L. Quezon nga “a government run like hell under the Filipinos” kay mao na kini ang mismong pangobyerno nga nipuyo karon uban kanato.

PILDE GANA NGA HUSTISYA

Way kabutangang kahimangud ug kalipay ang gibati ni NBN-ZTE Deal Whistleblower Rodulfo ‘Jun’ Lozada sa iyang pagkasayod nga human sa tulo ka tuig gipagawas na gyud sa Senado, pinaagi sa Senate Blue Ribbon Committee, ang resulta sa ilang imbestigasyon nga nagduso sa pagpa-impeach kang Pangulong Gloria Macapagal Arroyo ug sa pagpasakag kasong kriminal sa tanang nalambigit niini.

Apan sa atong ekslusibong pakighinabi kaniya sa tulumanong Alagad sa DYRF Radyo Fuerza, 1215 Khz AM wa niya kapugngi ang tuaw sa pagmahay ning atong hustisya diin ang mga bakakon nakaeskapo samtang sila na hinuong Joey De Venecia nga mikooperar sa Senado ang gilistahan og pwerteng daghanang kaso.

Ang nakaporke kay adto na usab unya mosangko kining maong rekomendasyun sa Kongreso og sa buhatan sa Ombudsman.

Mga inutil nga mga ahensyang wala pa gani makasugod sa imbestigasyon, daan nga nanglimpyo ug mi-abswleto kang Arroyo sa hinungdang kitang tanan nasayod ng daan. (ikeiidurano@ymail.com)