Ike O. Durano II
Alagad

SA pagkamatay ni Father Jovencio Rabusa sa kamot sa mga batan-ong tulisan sa dakbayan sa Talisay, nitumaw na sab ang problema sa suga sa naa-soyng dapit diin nahitabo ang linuog nga pagpatay sa pari nga sa hataas nga panahon gipasagdan lang sa administrasyon ni Mayor Soc Fernandez.

Kay mismo si Police Regional Office 7 Regional Director Lani-o Nerez ang nikumpirmar sa iyang pagbisita sa crime scene nga awaaw gyud ang maong dapit unya nisamot pa gyud sa tumang kangitngit, hinungdan nga mao kini ang gustong yampungaran sa mga batan-ong tulisan nga gustong mopahimulos sa mga lumalabay nga mga sibilyan.

Sa atong ekslusibong pakighinabi kang Mayor Soc Fernandez sa tulumanong Alagad sa DYRF Radyo Fuerza, 1215 Khz AM, maoy gipalusot sa Mayor nga di kayo tantong ngitngit ang maong kalsada kay duna may sugang dagitabnon gikan sa duha ka mga gasoline stations. Mao usay iyang gipasanginlan ang konseho nga pakyas sa pag-consummate sa kasabutan tali sa VECO (Visayan Electric Company) ug sa Local Government sa Talisay diin ang naasoy na nga kompaniya ang motaud og magmentenar sa tanang mga gigamit nga sodium lamps unya ang local nga pangagamhanan anh igo na lang magbayad sa kunsomo sa kuryente.

Apan matud pa ni Talisay City Acting Vice Mayor Allan Bucao nga way kamatuoran kining maong pagpamasangil sa mayor.

Kay ang hinungdan nganong dili na mosiga pa kining maong mga poste mao nga ang mga kuryente nga gilubong sa yuta ang nahurot na sa pagpangawat sa mga kiriwan hinundgan nga dili na gyud kini makasiga pa. Og niya pa nga nganong ihatag pa man sa VECO kining maong katungdanan nga unta pwerte mang daghanang mga Job Order Employees nga gipanghire ang Mayor alang ning maong katuyuan.

Si kanhi Bise Mayor Aber Belleza nitampo sab og sugyot sa kasamtangang mga nangatungdanan nga dili na unta pa mangitag palusot og manghunaw og mangitag kapasanginlan ning maong kapalpakan. Kay kining maong mga suga alang man sa kaayuhan sa katawhan sa Talisay, busa angayang ang syudad ang mohimo na sa deretsong pagtubag ning maong obligasyun nga wala kinahanglana pa ang pagpangampa.

Kaniadto sa dihang gipapawong ni Cebu City Mayor Tomas Osmena ang tanang mga suga sa South Coastal Road, ang tanang mga poste puros gyud wala magsiga. Apan sa dihang midesisyun na si Tomas nga kini pasigaon na, ang tanang mga poste naghurot usab sa pagpaniga.

Ambot og managlahi bang bibleya sa pangobyerno ang gisubay niining si Tomas og si Soc kay ang naulahi klaro man og dayag nga wala masayud sa hinungdan sa problema sa mga posteng wala misiga sa iyang dakbayan. Ang mas dakong makauuwaw kay sa kapakyas sa paghatag og solusyon sa maong problema, nigamit pa gyud intawon kini og buslot nga palusot nga nagpakita lamang sa kakuwang sa pagsabot sa opisinang iyang gilingkuran og giyak-an.

(ikeiidurano@ymail.com)