Durano: Panagsumpaki sa damgong paghiusa

Wednesday, March 17, 2010

NIKUMPISAL si Bise Mayor Michael Rama nga andam siyang makig-uli kang Gob. Gwen Garcia sa kagamhanan sa Probinsiya sa ngalan sa panaghiusa.

Kay niya pa, ang iyang pagpangatungdanan alang man sa pagserbisyo sa kinabag-an sa katawhan ug dili sa pagtagbaw lamang sa kagustuhan sa usa ka tawo.

Have something to report? Tell us in text, photos or videos.

Click here for Election 2010 updates

Si Cebu City Mayor Tomas Osmeña, sa ekslusibong pakighinabi sa Tulu-manong Alagad sa DYRF Radyo Fuerza, 1215 Khz AM ang nipahimangno sa iyang bise mayor nga dili niini isulod sa kompromiso ang mga urban poor dinhi sa dakbayan kansang kahimtang ang mahimutang sa alanganin kon dayunon gyud ni Mike Rama sa iyang administrasyon ang pakig-ulig buot sa Kapitolyo.

Gitin-aw usab sa mayor nga hingpit dang matapos ang iyang termino karong Hunyo 30 ug wala na siya’y gahum pa sa pagpanalipod sa madiskumpiyadong mga taga amihanang Sugbo kay ang iyang opisina adto naman unya sa Kongreso ug dili na sa Cebu City Hall.

Apan bisan pa man niini, siya nipasalig nga iyang babagan sa gihapon sa iyang personal nga kapasidad, uban sa pagduyog sa tingug sa katawhang Sugbuanon nga adunay representasyon sa Konseho sa dakbayan ang posibleng pag-uyon sa bag-ong nayor sa development projects sa Probinsya sa mga luna sa Banilad, M. Velez, Sudlon ug ang programa sa pagpangimbargo sa mga kayutaan nga gi-okupar sa mga Nasyonal nga mga ahensya ug buhatan alang sa komersiyal nga katuyuan.

Kalabot sa planong pagbanhaw ni Mike Rama sa Lot 93-1 Land Swap Deal tali sa probinsya ug sa ciudad, ang mayor nitataw nga wa siya’y pagsupak kon ipursige kini sa iyang sumusunod.

Kay niya pa, mismong si Mike Rama ang niuna sa pagsugnod ning maong isyu nga maoy hinungdan sa pagsilaob sa ilang panagbangi ni Gwen Garcia hangtud ning mga tungura, busa ug may plano siya’y mosulbad sa iya mismong gisugdang problema.

Dili siya mobabag kay siya nagtuo nga kini obligasyon ug katungdanan ni Mike Rama sa pagtunhay sa lukot ug gubot nga iyang gipasiugdahan.

Talagsaon kining maong kahimtang sa kagamhanan sa Dakbayan sa Sugbo ug sa Kapitolyo kay imbis ang panaghiusa magdala ug kalinaw ug kalambuan nga maoy nag-una usab nga gitumbok nga hinungdan nganong angayan nga undangon ang panagsungi kay bisa’g unsaon kitang tanan puros ra man mga Sugbuanon, ma taga Probinsya ka man o taga dakbayan.

Ang atangan ug huwaton sa katawhan ug unsa may mahitabo sa Partidong BOPK. Kun magpabilin ba si Mike Rama sa iyang baruganan sa pakighiusa sa mga Garcia sa Probinsya ug ablihan ang iyang pakigsumpaki sa amahan sa ilang partido nga si Mayor Tomas Osmena? O iyang usbon kining maong nabuhiang opinion?