Ike O. Durano II
Alagad

HUMAN gibawian sa iyang duha ka mga detailed bodyguards, si Consolacion Mayor Avelino Gungob nibawos kang Cebu Pro-vincial Police Office Chief Senior Supt. Jesus Gaquing ug sa kapulisan sa iyang lungsod pinaagi sa pagpaputol sa mga linya sa kuryente ug telepono sa argumento nga kini pagpaila sa kapulisan sa iyang gahum nga nalatid sa Administrative Code of the Philippines.

Sa susamang pakighinabi, siya nibutyag nga di problema ang komunikasyon kay naa naman ang mga cellphones ug kon dunay emerhensya nga nagkinahanglan og serbisyo sa kapulisan, mamahimo nga siya nalang mismo ang tawagan. Iya sab nga gidugang nga di niya ikasakit kon ugaling manglayas ang mga pulis diha sa tugkaran sa ilang Balay Lungsod kay naa man ang mga Barangay Tanod nga pwede nilang magamit aron mopatunhay sa kahapsay ug kalinaw pinaagi sa pagpatuman sa balaod.

Sun.Star accepts donations for victims of Typhoon Ondoy

Hinuon, siya niklaro nga andam siyang makig-estorya sa mga kadagkuan sa kapulisan aron sa pagresolbar ning maong problema, ubos sa kondisyon nga i-uli ngadto kaniya ang iyang duha ka mga pinalanggang bodyguards nga gideretso lang sa paghulbot nga wala gani igong pagtahod sa iyang opisina.

Apan si Sr. Supt. Gaquing, sa dihang ato usab nga nahinabi sa Tulumanong Alagad sa DYRF Radyo Fuerza, 1215 Khz AM, nipasabot nga nihatag siya'g igong notisya kang Mayor Gungob sa pag-withraw sa iyang mga detailed police bodyguards uban ang hinungdan sa mao niyang lakang. Iya usab nga gitin-aw nga walay sambog pamulitika kining mao niyang kamanduan ug igo lamang nilang gisubay ang ilang mandato sa pag-imbestigar ug pagdisiplina sa ilang mga gireklamong mga ginsakpan.

Aron sa pagseguro nga di masakripisyo sa hataas nga panahon ang napagang mga konstituente sa Consolacion, si Gaquing hinuon ang mismo nang nihimo sa koordinasyon sa ilang rehiyonal nga buhatan aron ang Philippine National Police Office na ang moabaga sa balayranan sa kuryente, tubig ug telepono imbis nga ang Local Government Unit.

Samtang katungod ni Mayor Gungob ang pagtagbaw sa iyang kaugalingon sa pagpanimawos sa iyang gikapungtang mga opisyal sa Kapulisan, apan angayan sab unta niyang huna-hunaon nga ning mao niyang binuhatan, ang katawhan ug dili si Gaquing ang naapekihan.

Bahala na unta og asa siya mangita og buruka apan dili makiangayon nga hatagan nalang niya'g serbisyo sa mga Barangay Tanods ang iyang mga konstituente sa Consolacion tungod lang sa dili niya masupil nga garbo. Angayang pukawon sa Mayor ang iyang kaugalingon nga kon pwerte niyang kisi-kisi kay dili siya mabuhi og wala ang iyang duha ka mga bodyguards nga mga pulis. Labaw na ang katawhan nga nagkinahanglan sa serbisyo sa kapulisan nga dili niya angayang ipagan sa personal nga kapritso.

(ikeiidurano@ymail.com)