Durano: Salamat, mama aying

Wednesday, September 1, 2010

SA HINGPIT nga pagbiya sa akong inahan niadtong Dominggo sa hapon tungod sa makadaghang pag-atake sa iyang kasing-kasing, lab-as pa sa akong panumduman nga sayo kaayo siyang nimata arun makig-estorya kanamo gamit ang bolpen ug papel kay dili naman siya maka-estorya sa iyang baba kay gipansakan naman kini og tubo tungod sa kritikal niyang kahimtang.

Dili kalikayan ang pag-agas sa akong mga luha nga nagtan-aw sa iyang malisod nga kahimtang kay bisan og daghan na kaayo og mga kutay ang iyang mga tudlo, sa mga wires alang sa pagmonitor kaniya, naningkamot gyud si mama sa pagsuwat aron maghangyo namong mga maguwang nga sa iyang pagbiya dili gyud namo pasagdan ang among mga manghud.

Have something to report? Tell us in text, photos or videos.

Updates on President Benigno Aquino III's presidency

Ako siyang gibadlong nga dili mobuhi og maong mga pulong kay gihimo na ang tanan aron matambalan ang iyang mihubag nga kasing-kasing og pneumonia. Unya magputol pa kami sa iyang wala nga tiil tungod sa acute diabetes nga mao usay nakahatag og taas nga level of infection sa iyang bloodstream.

Hataas na ang pakigkumbati ni Mama sa iyang mga sakit, gikan pa sa iyang operasyon sa dughan tungod sa stage 2 cancer of the breast niadtong 2005, ngadto sa glaucoma sa iyang mga mata ug pagputol sa iyang tuong tiil niadtong 2007 nga miresulta usab sa cardiac arrest apan na revive ra siya niadtong higayuna.

Sa dihang gitabang na si Mama sa mga doctor, dali akong mibiya ug miadto sa Chapel aron subling mangayo og tabang sa Labawng Gamhanan nga mao usay naghatag og lugway kang Mama kaniadto nga unta hatagan pa kami og dugang pang mga adlaw nga amo siyang makauban. Apan lahi man ang gihatag nga balita sa attending physician sa ICU kanako kay siya mipahibawo og mipasabot nga wala na gyud si Mama ug ila ng nabuhat ang tanan.

Daw mihunlak ang kalibutan sa akong pagkabati ning maong impormasyon kay wala na gyud ang tawo nga dili lang maoy nagpahimugso kanamo sa kalibutan kon dili mihalad usab sa tibuok niyang kinabuhi aron lang gyud sa pag-atiman kanamong iyang mga anak. Lima kami ka managsuon, ang among kamaguwangan nga si Monica usa na ka biologist, akoy ikaduha og bugtong anak nga lalaki, ang ikatulo nga si Edilynne usa ka registered midwife, ang ika-upat nga si Teofelynne usa na ka registered nurse nga nagtrabaho karon sa Qatar ug ang among kamanghuran nga si Rose ang graduating na usab karon sa kursong nursing.

Nagdako kami nga dili adunahan apan maoy gitudlo ni Mama nga kining maong kakulian dili namo himuong babag sa kalampusan ug hinonua ang matag problema angay nga pasalamatan kay kini ang maglig-on kanamo sa mga mas dagko pang pagsuway sa kinabuhi.

Kung unsa kami karon ug sa umaabot, kini tungod sa pagsakripisyo og pagmatuto sa among inahan. Mao nga bisan sa katapusan ako magpasalamat kanimo, Mama Aying, sa imong dakong gugma kanamo nga amo usab nga pagabawnon sa among dughan hangtud sa kahangturan.