Durano: “Solutio indebeti”

Wednesday, September 8, 2010

ANG atong Kodigo Civil nagmando nga sa higayon nga adunay solutio indebeti (unjust enrichment), ang nakapabor sa pagpahimulos sa butang o kantidad nga dili alang kaniya adunay obligasyon sa pag-uli niini sa tinud-anay nga tag-iya. Mao kini ang konsepto sa atong pamalaod nga nagdili sa buhat sa pagpamentaha.

Ning bag-o gikalipay sa mga Pilipino ang giduso karon nga balaudnon nga maghatag og exemption sa 12 percent Value Added Tax sa elektrisidad kay kini dili lamang maghatag og dakong alibyo sa matag bulan nga galastuhan. Napanglantawan nga maghatag usab kini og epekto sa posibleng pag-ubos sa presyo sa mga palaliton kay mamenosan naman usab unya ang Cost of Production.

Have something to report? Tell us in text, photos or videos.

Updates on President Benigno Aquino III's presidency

Apan luyo ning maong nag-unang maayong balita, nagpahipi na usab ang laing hataas nga kalbaryo alang sa atong mga konsumidor kay ang Malakanyang mikumpirmar nga walay laing mahimo ang gobyerno gawas sa pagpasa sa publiko sa dako kaayo nga alkanse sa mga Government Owned and Controlled Corporations nga anaa sa Power Sector ug gani kini sa sumada mokabat naman ngadto sa 900 Bilyunes ka pesos. Tungod niini, dili na usab unya kapugngan ang pagpatong sa dugang balayrunon sa daang nagbakutot nga mga abaga sa atong katawhan kay lagi wa may mahimo ang atong kagamhanan gawas sa pag-atubang sa maong mga utang nga ilang gigarantiyahan.

Taliwa ning maong kahimtang, ato na lang ba diay nga piyungan ang kamatuuran nganong naalkanse kining maong mga GOCC’s, nga unta ang tanan nilang gimugnang kuryente ang aduna may captured market? Unya nganong ang ilang mga systems losses ang utro man sab gihapong ihapak sa mga konsumidor? Hinungdan nga ang mogawas ra gyud nga rason sa pagka-alakanse mao ang way uwaw nga paganti sa mga tagdumala sa ilang mga kaugalingon sa makabungog sa kadako nga sweldo, bonuses ug mga benepisyo.

Nganong dili man subayon sa administrasyon kon si kinsa ang mga responsable ning maong niburot pagmaayo nga alkanse sa operasyon sa mga GOCC’s imbis nga modiretso dayon sa pagbundak sa palas-unon katawhan? Angay nga subayon ug tukion kon si kinsa ang nakaganansya og nabulahan unya sila maoy patubagon ning mismong produkto sa ilang kabuang.

Ning higayuna, angay nga ipakita ni Noynoy Aquino nga ang iyang pangobyerno ang dili lamang kutob sa estorya ug hata-hata. Ang pagpahamtang og silot sa mga badlungon ug mga kurakot ipatuman gayud aron sa paghatag og hustisya sa atong katawhang nagkalisud.

Kon kining maong tahas iyang ikapakita nga kaya niyang buhaton, dili lamang pagdayeg ang iyang maangkon kon dili lakip na usab ang pag-abot sa banag-banag sa kalambuan ning atong nasod nga dugay na kaayong gipangandoy sa atong katawhan apan sige lang sa pagka-unsyami tungod sa walay ayong matang sa pangobyerno.