SA nagsingabot nga away ni Pambansang Kamao Manny Pacquiao batok kang Puerto Rican Miguel Cotto ngadto sa Las Vegas, Nevada sa Estados Unidos, naghugop na usab ang mga tigpagawal nga mga kongresista ug mga tag-as nga mga opisyal sa kagamhanan sa pagbiyahe sa gawas aron kintahay personal gyud nga mosaksi ug mohatag og moral support kang Pacquiao.

Wa magpa-alkanse si House Speaker Prospero Nograles kinsa nipaburot sa iyang pagka-Mindanaoan aron mangangkon nga kabahin na siya sa Team Pacquiao busa dili nalang igbale ang ilang mga katungdanan sa Kongreso basta kay unahon gyud ang kapritso.

Sun.Star accepts donations for victims of Typhoon Ondoy

Kining maong ehem-plo gisunod usab sa ubang mga baga’g nawong niyang ginsakpan sa palusot nga ilang kwarta ang ilang gastuhon ning maong pagbiyahe, busa walay sukaranan ang pagpanudya kanila sa katawhan.

Nihatag sab og konsuelo si Nograles nga di nila sipyaton ang pagtambong sa pagbalik sa sesyun sa Kongreso ka-rong Nob-yembre 9 apan mamiya ra gihapon ang mga kanahan kay di gyud lagi kuno kapugngan ang pagilok sa ilang mga tiil kay gusto gyung molarga sa Amerika.

Ang pipila sa mga Kaparian sa Simbahang Katoliko ang dayag nga mihangyo ning maong mga opisyal nga dili nalang magwaldas sa ilang sapi ngadto sa gawas kay gawas nga wa pa makabangon ang nasud sa ekonomikanhong krisis, daghan usab sa atong mga kabus nga mga kaigsoonan sa Luzon ang padayon karong nag-antos sa kadaut nga mugna sa sunod-sunod nga mga bagyo.

Si Father Max Abalos, SVD kinsa atong nahinabi sa Alagad sa DYRF Radyo Fuerza, 1215 Khz AM namahayag nga pwede mang motan-aw, mosuporta, mangaliya ug mo-abiba ang mga kongresista nga wala na kinahanglana pa nga moadto gyud sa Amerika. Gani, ning maong pamaagi mas makauban pa nila ang ilang tagsa-tagsa ka mga konstituente ning maong talagasaon nga kahigayunan sa atong katawhan nga makabati og garbo sa atong pagka-Pilipino.

Kining maong kinaiya sa atong mga opisyal nagpakita lamang nga ang mga nagsilbe kintahay sa katawhan walay laing prayoridad kon di ang ilang mga kaugalingon. Puwera lang sa pipila susama sa atong mga Sugbuanong Kongresista nga wa pay nasakpang molarga.

Lab-as pa sa panumduman sa katawhan ang tagsa ka milyun nga panihapon sa Presidenti uban gihapon sa iyang mga alipores nga mga Kongresman didto sa Estados Unidos og sa dihang nabuking modayon lang sa pagpanghambog nga mag-ilog pa sila og si kinsa’y mobayad kay nagbusagak na ang ilang sapi og wa nay kabutangan pa niini.

Ang nakalaw-ay lang kay sayod ang International Community sa atong pagpakilimos kay di ta makagasto sa reconstruction ug rehabilitation human sa bagyong Ondoy og Peping, apan og personal nga kapritso mangawas man diay ang kwarta sa mga Opisyal sa gobyernong walay makatupong sa pagkahambugero.

(ikeiidurano@ymail.com)