MAKASAKSI na sab og laing kulbahinam nga aksiyon ang mga lumolupyo sa lungsod sa Tabogon sa pagpahigayon sa 1st Zigfred Povadora Duterte Invitational Motocross Cup karong Oktubre 31 sa Caduawan, Tabogon, Cebu.

Ang lumba, nga gipasiugdahan sa Keiz BJ Motors, mao ang ika-14th leg sa MS Motosuit Motocross Series 2009.

Si 2008 Rider of the Year Siegfred M. Ornopia sa Keiz BJ Racing Team, kinsa maou maoy nangusog aron mapahigayon kining maong lumba, nagkanayon nga kumpirmadong mopakita’g aksyon ang bantugang rider sa nasod nga si Glenn Aguilar lakip na ang iyang teammate nga si Dondon Yu.

Sun.Star accepts donations for victims of Typhoon Ondoy

Nidugang si Ornopia nga mangapil sab sa lumba ang ubang mga dekalidad nga riders gikan sa Manila.

Sama ni Ornopia, kinsa manalipod sa iyang korona sa Executive-A, ang iyang tulo ka mga anak nga sila si Earl Jean Brylle, Ken Kerry ug Kerry Keizer mopakita sab sa ilang abilidad sa nagkalainlaing kategoriya.

Si Brylle manalipod sa iyang titulo sa mini class category, si Ken-Ken modepensa sa iyang titulo sa pewee class samtang si Keizer mopakita’g aksiyon sa bag-ong gidugang nga kategoriya nga mao ang pewee 5-year below.

Ang 1st Zigfred Povadora Cup, nga kabahin sa tinuig nga kapistahan sa ilang mahal nga patron Mother of Perpetual Help karong Oktubre 31, gipaluyohan sa Sunriser Motorcycles, JIGMA Construction, Mayor Erwin Agustino, ug ni Cong. Benhur Salimbangon.

Gipaluyohan sab kini nila ni Felipe Montejo, Capt. Manuel Wagas, Noel Solon, Edmund Pingkian, Back to Back Motorcyle, RMO Parts Shoppe, F&FO Motor Parts, Cebu Reliance Motor Parts, MS Unlimited, MS Digital, Manang Lourdes Furniture, Reynante Tigue, Opo Gemelino, Aidorg Mktg., Global MFG Corp., NS Trading ug Pepito Asignar. (ESL)