Edipisyo sa tunghaan kahugnuon, pabiyaan
DUHA ka andanang edepisyo nga gilangkuban sa 12 ka mga classroom sa Mandaue City Central School gikahadlokan nga mahugno hinungdan nga girekomendar nang di ipagamit.
Laing duha ka andanang edepisyo nga gilangkuban usab sa siyam ka mga classroom kuyaw gihapon nga mahugno.
Hinungdan nga ang Mandaue City Engineering Department nirekomendar nang di na kini ipagamit ug biyaan na.
Apan bisan pa niini, padayong giklasehan ang ubos nga bahin tungod kay wa pa silay nakit-ang kabalhinan.
Niadtong Abril 29 ang Engineering Department pinangulohan ni Engr. Antonio Sanchez nipagawas og kamandoan sa pagbakante na sa maong building nga gilangkuban sa dose ka mga section sa grade-2.
Kini gumikan sa giingong kagubaon na ug nangadunot na ang mga dapat nga kahoy ug di na gayod mahimo pang magamit tungod sa kakuyaw nga mahugno.
Gihulagway ni Sanchez nga di na luwas ang building kon padayonng gamiton ug nabutang sa peligro ang kinabuhi sa mga magtutudlo ug mga tinun-an.
Si Mrs. Cecilia Entera Central District Supervisor, uban sa principal sa tunghaan nga si Ofelia Marfa, nipakita sa Sun.Star Superbalita sa gubaon na nilang building.
Apan bisan pa sa kamandoan sa engineering department, padayong giklasehan ang ubos nga bahin sa building.
Hinuon ilang gipasalig nga pangitaan ra nila kinig paagi taliwa nagkuwang nga classrooms.
Usa na niini ang double session kun laing klase sa buntag samtang lain na usab nga klase sa laing mga tinun-an sa hapon hangtod makakita silag kabalhinan.
Samtang kon kuyaw ang building sa grade-2 gihulagway sa mga magtutudlo nga mas kuyaw usab ang building mga giukopahan sa grade-3 nga gilangkoban sa siyam ka mga classroom tungod kay nabantayan nila ang pag-uyog niini.
Grabe usab ang pagkadunot na sa mga dapat nga kahoy nga wa na magtugkad sa yuta samtang ang mga haligi gipangaon na usab sa anay.
Si Entera niingon nga wa pa kini ma-inspection sa engineering department apan sa higayon nga masusi na kini magpaabot na lang sila sa rekomendasyon.
Apan kon irekomendar nga bakantihan lain na usab unya nga suliran ang ilang atubangon.
Hinuon si Benjamin Tiongson, administrative officer sa Mandaue City School Division, niingon nga si Mayor Jonas Cortes nahibawo na sa ilang suiran ug nisaad nga mogahin og pundo aron pagpatukod og mga tunghaan sa Mandaue City Central School.
Nasayran nga hangtod pa sa Hunyo 30 ang pagpanawat og mga tinun-an sa pampublikong tunghaan.