MAKAINTRIGA gyud kining pagdungan nilang sportsman Atan Guardo ug Barangay Kapitan Mary Ann delos Santos sa pag-anunsyo sa ilang hiniusang programa alang sa Syudad sa Sugbo ug sa pagduso niini.

Nagkanayon ang duha nga ilang programa giingong “OUR Cebu City.

Daw ilang gibangga niini ang MYCT ni Mayor Tomas Osmeña mao nga dali nikatap nga modagan pagka mayor ug bise mayor silang Atan ug Mary Ann.

Sun.Star accepts donations for victims of Typhoon Ondoy

Bisan pa man, nagsigeg insister ang duha nga pagka kongresista ang ilang daganan samtang naghisgot sa ilang programa alang sa “opportunity, unity, ang reforms” kun oportunidad, panaghiusa, ug reporma.

Apan lahi sa MYCT sa Bando Osmeña-Pundok Kauswagan (BO-PK) nga nagduso og mga personalidad, ang “Our Cebu City” nilang Atan ug Mary Ann naghisgot sa unsay ilang gilantaw nga buhaton.

Pananglitan, ilang padayunon ang proyekto ni Mayor Osmeña nga South Reclamation Project (SRP) ug ang proyekto ni Gob. Gwen Garcia nga Ciudad aron makaabli og daghang oportunidad alang sa panginabuhi ug negusyo.

Gilantaw nga dagkong mga lakang kini alang sa maayong relasyon tali sa Syudad sa Sugbo ug sa Kapitolyo.

Kausaban kini nga sayon makab-ot kon ang liderato sa Syudad sa Sugbo di arogante ug sayon katuohan sa mga Sugbuanon.

Tuod man, nahimong alternatibo sa mga Osmeña si Atan ug Mary Ann.