NAGPASALAMAT ang mga lumolupyo sa usa ka lungsod sa Cagayan sa bag-ong nanubong kakayohan nga nakaluwas kanila sa grabing mga damyos dihang nihapak ang bagyong Pepeng ug Ramil sa amihanang Luzon.

Nakahibawo na man kita nga daghang mga komunidad sa Luzon ang nalubong sa mga land-slide samtang napuno sa baha ang kapatagan.

Nasayran nga malampuson ang lungsod sa Peñablanca sa ilang pagpahigayon sa usa ka reforestation project nga nitabon og kakahoyan sa 2,500 ka hektarya. Ang mga batan-on pa nga mga kahoy nakapatuhop sa subrang tubig gikan as ulan ug nigunit sa yuta aron malikayan ang pagdahili sa yuta.

Sun.Star accepts donations for victims of Typhoon Ondoy

Mao unta kiniy atong panaminan ug sundon dinhi sa Sugbo imbes magpadayon sa pagpahigayon og mga kaingin, mga housing project, ug laing mga proyekto sa kabukiran.

Gani, bisan ang malampusong refores-tation project ni retired Gen. Tiboy Fusillero gikontrahan sa mga barangay kapitan ug opisyal sa Syudad sa Sugbo.

Sa pagkakaron, suwerte ang Sugbo kay wa kita sugsoga sa sunod-sunod nga mga bagyo.

Panahon unta karon nga panamnan na nato ang atong kabukiran. Di lang landslide ug baha ang mapakgang. Pinaagi sa proseso nga photosynthesis, gigamit sa mga kahoy ang carbon dioxide aron mabuhi ug giilisag oxygen nga maoy gikinahanglan sa mga tawo.

Ang pagpananom og mga kahoy sa atong upaw nga kabukiran makatabang sa pagkunhod sa kadaghanon sa carbon dioxide sa kahanginan ug makatabang sa atong pagsulbad sa giingong climate change.