Editoryal: Dengue naghulga sa nasod

Sunday, September 5, 2010

GRABE ang pagsaka sa kaso sa dengue fever ning tuiga sa lokal ug nasudnong talaan sa Department of Health (DoH).

Gikan sa Enero hangtod sa Agusto 2010, ang DoH na nitala og 62, 503 ka mga kaso sa nagkasakit og dengue fever sa tibuok nasod, 88.8 percent kini nga pagsaka kon itande sa samang panahon sa miaging tuiga.

Have something to report? Tell us in text, photos or videos.

Sa Central Visayas (CV), nikabat sa 25 porsiyento nga pagtubo sa kaso sa dengue fever sa samang panahon.

Gikataho nga dunay mga dapit sa nasod nga nideklarar na og ‘state of calamity’ tungod sa grabeng pagsaka sa maong sakit nga makamatay.

Si DoH Sec. Enrique Ona nipadayag sa iyang kabalaka tungod sa paghulga sa dengue ug nimando sa mas hugot ug halapad nga kampanya sa impormasyon batok sa dengue.

Ang lokal nga kagamhanan, labi na sa mga nag-unang dakbayan sa Metro Cebu, nagpagawas na og minilyong salapi alang sa pagpakigbatok sa dengue ug pagtabang sa mga nagkasakit sa dengue fever sud sa mga ospital sa dakbayan.

Sa sisyon sa hunta sa lalawigan sa Sugbo karon, ang hulga bahin sa dengue nag-unang tukion alang sa hiniusang operasyon sa kalungsoran batok sa dengue.

Nasayod kita nga ang mga hingtungdang ahensya sa kagamhanan ninglihok na sa pagpakigbatok sa dakong hulga sa panglawas apan, kinahanglang hatagan kini og igong suporta sa publiko aron magmalampuson.

Kay ang matag kinabuhi sa usa ka sakop sa komunidad maoy gihulga sa sakit busa, molihok usab kita sa bag-ong gubat batok sa lamok nga nagdala sa virus sa dengue.

Bisan sa ginagmay natong mahimo sama sa pagyabo sa tubig nga itlogan sa lamok, dako na og matabang sa pagsanta sa nasudnong hulga sa panglawas - ang dengue.