DAGHAN na kaayo ang nadisgrasya niining biyaan ang mga bata nga way magbantay sa balay.

Sukad sa 2000, moabot na og 31 ka mga bata ang nangamatay sa lain-laing mga insidente sa sunog.

Kini laging kinahanglan gyud nga mobiya ang mga dagko sa balay kay maningabuhi o dunay laing importante nga lakwon ug biyaan lang ang mga gagmayng bata nga way nagbantay.

Sun.Star accepts donations for victims of Typhoon Ondoy

Ang labing ulahi nga hitabo mao kining tres anyos nga babaye nga namatay dihang nasunod ang ilang balay didto sa Syudad sa Toledo sa miaging Domingo.

Ang lola nga nagbantay sa natulog nga bata nitambong og usa ka prayer service. Wa damha nga matumba ang kandila nga nagsiga sa altar.

Pagbalik sa lola sa balay, naugdaw na kini apil ang iyang apo.

Ug di lang mga gagmayng bata ang kuyaw nga mabiktima sa sunog.

Dinhi sa Syudad sa Sugbo, usa ka 61 anyos nga paralitikong babaye nga nag-wheelchair ang namatay pagkasunog sab sa ilang balay sa miaging gabii.

Ang nagbantay niya nilakaw kay gisugo ngadto sa gipanag-iya sa pamilya nga barbekyuhan.

Kining mga insidente angayang panaminan nato nga di gyud angay nga biyaan ang mga gagmayng bata nga mag-inusara sa balay o kining mga masakiton nga maglisod og eskapo kon simbako dunay sunog nga mahitabo.

Di ra ba gyud matag-an kon kanus-a moigo kining ingon niini nga katalagman.