SAMTANG wa pa modeklarar ang mga lokal nga mga opisyal nga gituohang modapig sa kandidato sa administrasyon, nagkaanam kaklaro ang paninguha sa oposisyon sa pagdani sa mga lokal nga mga lider.

Kahinumdoman nga di pa lang dugay, halos tanang mga lider sa Sugbo nagsuporta sa administrasyon ni Presidente Gloria Macapagal-Arroyo. Apan anam-anam nga nidapig ang pipila ka mga lider ngadto sa oposisyon sama pananglit kang Mayor Tomas Osmena nga naa na karon sa kampo ni Sen. Noynoy Aquino ug sa Liberal Party.

Sun.Star accepts donations for victims of Typhoon Ondoy

Ang ubang mga Osmena sama nilang kanhi senador John H. Osmena ug kanhi gobernador Lito Osmena nipabanhaw sa Panaghiusa kuyog kang kanhi kongresista Junnie Martinez. Samtang wa pa silay klarong anunsyo kon si kinsa sa mga presidentiable ang ilang suportahan, nagkaanam katin-aw nga naa sab sila dapig kang Sen. Aquino.

Sa pikas nga habig, wa pa mopadayag si Gob. Gwen Garcia nga naa siya mosuporta kang Defense Secretary Gilbert Teodoro nga maoy opisyal nga kandidato sa Lakas-Kampi coalition sa administrasyon ni Presidente Gloria Macapagal-Arroyo. Ug atong mabantayan nga nagsigi pagpangulitawo kang Gob. Garcia si Sen. Villar.

Molampos man si Villar sa pagdani sa gobernador o dili, makita na nato nga di na tibuok ang Sugbo sa pagsuporta niini sa kandidato ni Presidente Arroyo. Di na mausab pa ang nahitabo sa 2004.