MAO pa gani paghisgot ni Atan Guardo ug Barangay Kapitan Mary Ann delos Santos nga mobiya sa klase sa pulitika nga manghimaraot ug di maghisgot og mga plano alang sa Syudad sa Sugbo, nanaway dayon kini si Mayor Tomas Osmeña sa ilang gibuhat.

Matod pa sa mayor, pang-publicity lang kining ilang Atan ug Mary Ann.

Sun.Star accepts donations for victims of Typhoon Ondoy

Base sa nahibaw-an sa mayor sulod sa pipila ka dekada niya nga pagsawsaw sa politika, ang pamulitika pulos lang pang-publicity ug pagpanaway. Ug mao ra kiniy iyang pagbasa sa gibuhat karon sa iyang mga kaatbang.

Lit-ag sab kining kalaki sa mayor. Kon tubagon man gani siyag panaway, moingon dayon si Tomas nga tan-awa, mobawos man sab og lapok.

Apan tinuod ba nga pang-publicity lang kining ilang Atan ug Mary Ann?

Mga batan-on pa kini sila, di ba mahimo nga sila modala sa tingog sa bag-ong pulitika dinhi sa Syudad sa Sugbo?

Dakong hagit kining gisudlan nilang Atan ug Mary Ann nga modala sa bag-ong pulitika sa usa ka dapit nga tradisyonal nga gitawag og Osmeña country.

Gani, di mahibudngan nga moabot og lima ka mga Osmeña ang magpapili alang sa lain-laing mga katungdanan sa Syudad sa Sugbo.

Kini lang paglikay sa mga pagpanaway ug pagsugsog ni Tomas, gikinahanglan gyud ang disiplina.

Mas dakong hagit ang pagdani sa atensyon sa mga Sugbuanon aron mopaluyo og mga plano alang sa ilang kaayuhan ug di kaayuhan sa mga pulitiko.