DAGHAN man tuod ang mga kaso diin nayatakan ang hustisya labi na niining padayong gubat tali sa mga rebelde ug kagamhanan.

Apan usahay, makaingon kita nga mopa-tigbabaw sab ang hustisya.

Hinuon, depende kon asang habig kita nagtan-aw o nagdapig.

Sun.Star accepts donations for victims of Typhoon Ondoy

Niining kaso sa tulo ka mga batan-ong Sugboanon nga nasikop sa Negros Oriental atol, matod pa sa militar, sa usa ka encounter sa New People’s Army (NPA), daw nilutaw ang kamatuoran dihang gibuhian sila kay way nakitang basehanan ang buhatan sa piskalya didto sa Negros.

Nasayran sa piskal nga lahi diay nga insidente ang usa ka shoot out diin namatay sab ang laing batan-on nga gituohang sakop sa mga rebelde.

Bisan pa man sa giingong mga ebidensya sa militar, nipatigbabaw niining tungora ang awtoridad sa atong sistema sa hustisya.

Angayan lang gyud nga buhian ang tulo basi sa nakit-an sa piskal.

Kining maong hitabo mahimong tan-awon nato nga kadaugan sa hustisya ug sa atong sistema nga demokrasya. Sukwahi kini sa propaganda sa mga rebelde nga wa nay paglaom ang atong kahimtang karon mao nga giduso nila ang armadong pakigbisog.

Ang kuyaw lang sa ingon niining kadaugan sa hustisya kay sa sunod higayon, basin mangita na hinuon og mga shortcut ang mga tinugyanan ug di na mosubay sa proseso sa atong balaod.

Angay lang nga sa bangi sa hustisya ug seguridad, hustisya gyud ang mopatigbabaw.