Editoryal: Juvenile law

Wednesday, July 28, 2010

SA mga krimen nga nanghitabo sa palibot, di ikalimod nga ubay-ubay niini naglambigit og mga batan-on.

Pananglitan ang pagbanhig sa negusyanting si Nicolas Ting kinsa usa ka 16-anyos ang gitumbok ug gani miangkon sa maong salaod.

Have something to report? Tell us in text, photos or videos.

Updates on President Benigno Aquino III's presidency

Laing hitabo mao ang pagtulis sa taxi sa Mandaue kansang mga suspetsado kasagaran menor-de-edad, ug ingon man ang pagpatay sa dalagita niadtong Dominggo sa gabii nga gimaniubra usab sa mga nagpangidaron og 16 ug 17 anyos. Apan bisan pa man og nangasikop ang mga nagbuhat sa ingon, dili tugbang ang silot nga ilang maangkon sa grabing sala nga ilang nahimo.

Ubos sa Republic Act (RA) 9344 nga juvenile law, ang nagpangidaron og 15 anyos ug paubos dili maapil ug way tulubagon sa sala nga iyang mahimo. Sa ato pa, gawasnon siya sa bisan unsang krimen nga iyang mabuhat.

Kadtong makahimo og krimen nga kapin na sa 15 anyos ang panuigon apan di pa motangkod ang panuigon sa 18, di gihapon mapasakaan og kaso ug mapriso, apan ipaubos kini sa intervention o rehabilitation program.

Ning maong balaod nga gihimo ni Senador Kiko Pangilinan ug iyang napapasar sa kongreso, daw sa nagduot na hinuon sa biktima kay sama ra man nga gihikawan siya sa hustisya.

Ang hustisya molutaw lang kon dunay tugbang nga silot nga ipahamtang ngadto sa makasasala.

Wa lantawa ni Senador Pangilinan nga ang iyang balaod nga napalabang mahimong mapahimuslan sa mga dagkong krimenal nga mogamit sa mga menor-de-edad alang sa ilang dautang katuyo-an.

Wa tan-awa sa senador nga mora lang og iyang gianad ang mga batan-on ug sa pagbuhat og mga krimen.

Sa negatibong paglantaw, kini maoy nakapadaghan sa krimen nga nanghitabo karon. Busa angay lang gayud kining usbon.