Editoryal: Nagusbat nga kahusay ug kalinaw

Wednesday, March 17, 2010

MAIHAP na lang sa mga tudlo ang adlaw sa pagsugod sa local campaign alang sa umaabot nga piniliay.

Sulod ning mga adlawa sa kampanya anha na usab nato madungog ang mga pasalig sa mga magpapili sa nagkadaiyang lokal nga posisyon.

Have something to report? Tell us in text, photos or videos.

Click here for Election 2010 updates

Pasalig diri, pasalig didto aron lang gyud makuha ang sempatiya sa mga magbubuto.

“Serbisyo sa publiko” maoy tema sa matag usa kanila. Kon unsang mga benepisyo ilang ipasalig nga ihatag ngadto sa publiko kon sila anaa na sa puwesto. Kining gihisgutan nato sa unahan, mahimong adunay nakatuman apan pipila ra ka pugyot kon itandi sa nagpaharuhay human napili.

Ning bag-ohay lang, mga pundok sa kababay-an sa dakbayan sa Talisay ang nasagmuyo sa tibuok konseho dihang mismo sa ilang atubangan daw sama sa gibaliwala ang ordinansa nga maghatag unta kanila og kaayuhan.

Imbis magmaya, ang kahikurat maoy misugat kanila sa dihang gihuboan sa iyang komitiba si konsehal Shirley Belleza nga mao unta ang mopasaka sa maong ordinansa.

Si Belleza, last termer, kinsa naila nga kaalyado sa grupo sa administrasyon, nipadayag nga mosuporta sa tanang kandidato sa maong pundok gawas lang ni Vice Mayor Allan Bucao, ang kaatbang sa iyang bana nga si Aberdovey nga anaa karon sa oposisyon.

Sa ato pa, gipatigbabaw sa tibuok konseho ang bulok sa pulitika kay sa kaayohan sa mga molupyo nga maoy nagpili kanila. Mga saad ug panumpa ilang gitunobtunoban ug gibaliwala, sukwahi sa ilang gipasalig kaniadto aron sila pilion sa mga magbubuto.

Sa gibuhat sa konseho, daw sama ra nga gitudloan nila ang publiko nga hashasan og maayo ang mga kandidato ug di na gyud magpadala niadtong napili na nga way nahimo sa konseho gawas lang sa pagbabag sa kaayuhan nga unta nga ilang madawat. Ayaw padala, hukmi sila.