Editoryal: Paglapas sa balaod

Thursday, April 29, 2010

WAY si bisan kinsa nga labaw sa balaod. Bisan gani ang presidente sa nasod gikinahanglan nga mosunod niini.

Kon duna ganiy gihimo ang presidente nga gituohang nakalapas sa balaod, duna may katungod ang si bisan kinsa nga mokiha ngadto sa judicial branch aron mahukman kon nasubay ba ang iyang aksyon sa balaod. Ang presidente andam nga motuman sa balaod kon ang gisulti sa judicial branch nagsulti nga siya nasayop.

Have something to report? Tell us in text, photos or videos.

Click here for Election 2010 updates

Kon ang presidente nga maoy labing gamhanan nga tawo sa nasod nagsunod sa balaod, unsa na kaha ang usa ka lider sa lokal nga kagamhanan nga ang teritoryo limitado?

Apan usahay ang gahom na gani maoy mosulod sa utok sa usa ka tawo, magtuo na siyang maoy balaod ug mao na say huwes.

Alang kaniya siya ang kanunay sakto samtang ang uban sayop.

Basin mao sab ni ang nahitabo kang Mayor Tomas Osmeña nga mitugot sa pagpadagan sa mga Kaoshiung bus sa siyudad ngadto sa lalawigan bisan wa magtangag sa red plate isip sakyanan sa kagamhanan.

Wa say napakita nga mga dokumento nga kini nga mga sakyanan narehistro.

Di na lang ta maghisgot kon narehistro ba kini o wa kay isip mga sakyanan sa kagamhanan kini angay gyud nga mga rehistrado kay ang City Hall maoy mag-una gyud unta sa pagsubay sa balaod.

Apan nganong sayon ra man kaayong gipadagan sa Siyudad ang mga bus nga gisakyan sa mga bata ug hamtong ngadto sa lalawigan nga way plaka ug tarong nga mga dokumento? Kon duna pay nahitabo nga di maayo, andam kaha sila sa pagpanubag?

Kon ang usa ka pribadong sakyanan nga nagdagan makuwestyon, nganong di man kini mahimo sa iyaha sa gobyerno?

Ang tawo nga makahimo lang niini seguradong nagtuo nga siya ang labing gamhanan ug siya ang kanunay bisan nakalapas na kini sa balaod.

Unsa kahang matanga sa balaod ang mapanday sa tiglapas niini?