HUMAN sa pipila mga adlaw nga abi nato og nahagsa na gyud kining proyekto sa Commission on Elections (Comelec) nga mahimong awtomatik ang pag-ihap sa mga boto karong 2010, nabuhi na sab kini.

Kahinumdoman, nidaog ang Smartmatic ug Total Information Management (TIM) sa pagpakanaog sa maong P11.3 bilyunes nga project.

Apan kalit nga nag-away ang mga dagkong opisyal sa duha ka mga kompanya nga nag-partner.

For updates from around the country, follow Sun.Star on Twitter

Daghan ang lain-laing mga pasangil sa sinukliay sa duha ka mga kampo ug makapabalaka kini kay naapil na man ang mga tinguha sa mga pulitiko nga maimpluwensya ang dagan sa piliay sa 2010.

Ug nagkauli ra sab ang duha ka kompanya.

Bisan pa man, atong baruganan nga di makatangtang gyud sa pagpanikas kining poll automation kay kining computer mag-agad ra man sa gi-program niini ug sa mga impormasyon nga gihungit.

Kon di ligdong ang mga tawo nga nagdumala niining mga proseso sa pag-program ug pag-feed og impormasyon, dako gihapon ang posibilidad sa pagpanikas.

Gawas pa, di mapapas pinaagi sa poll automation ang pagpamalit og mga boto.

Hinuon, dako sab gyud ang kalainan kon human sa pipila ka oras, makahibawo na kita kon si kinsa ang nidaog.

Ug magsugod kita dinhi sa pagpalambo sa atong sistema sa pagpili og mga opisyal nga modala sa renda sa pangagamhanan.

Mao nga nalipay kita nga madayon gyud kining poll automation.