Editoryal: Responsabilidad sa Presidente

Monday, September 6, 2010

ARON di modako og di molanat og dugay ang kontrobersiya, giangkon ni Presidente Noynoy Aquino ang tanang responsabilidad kalabot sa nahitabong hostage-taking sa Kaulohan nga mikalas og kinabuhi sa walo ka Hong Kong tourists.

Gibuhat kini sa presidente taliwala sa nagpadayong imbestigasyon diin nakita ug naobserbahan sa kadaghanan nga nagtudtud na lang ang pipila niya ka mga tawo kon kinsa gyud ang angay basulon ug kinsa gyud ang sad-an nga sarang lang kasilutan.

Have something to report? Tell us in text, photos or videos.

Updates on President Benigno Aquino III's presidency

Gani gumikan niini, daw sa natibhangan ug niunlod ang popularidad ni Presidente Aquino, kay natural adto man gyud mobanda niya ang tanang pagbasol.

Sa inabtik nga paagi, ang handler sa presidente mihimo og mga lakang o stratehiya aron mapahigayon ang damage control.

Tuod man sa pag-angkon sa presidente, dunay nakadayeg sa iyang gibuhat kay mahulagway man nga wa niya talikdi ang iyang kapangakohan sa nasod isip usa ka presidente.

Apan sa laing bahin, mitumaw usab ang mga pangutana kon unsa may sunod buhaton sa Presidente human ning iyang pag-angkon sa responsabilidad?

Buot ba ipasabot nga wa nay tulubagon ang mga tawo nga mao gayud ang tinud-anay nga hinungdan kon nganong napalpak ang negusasyon sa hostage-taker ug sa mga tinugyanan sa balaod?

Ang pag-angkon ni Aquino sa responsabilidad wa magpasabot nga iyang iabsuwelto ang mga nakasala sa maong hitabo kon dili tulubagon usab niya ang pagpalutaw kon kinsa gayud ang tinud-anay nga nakahimo og salaod ug ingon man ang pagpahamtang sa tukmang silot niini bisan og si kinsa man hingtungdan.

Kay kon kini iyang ihikaw sa katawhan, tingali baya og motiurok ug mokunhod og maayo ang pagsalig sa kinabag-an ngadto kaniya.