DI sala ni Maria Lourdes Farro nga premature ang iyang anak nga lalake dihang gihimugso kini diha sa Cebu Doctors Hospitalsa miaging Hulyo 22, 2009.

Tungod niini, kinahanglang ibutang sa Neo-Natal Intensive Care Unit ang bata ug ang bayranan dali kaayong nitubo ngadto sa P503,000.

Sun.Star accepts donations for victims of Typhoon Ondoy

Samtang si Farro gi-discharge pag Hulyo 24, 2009, ang iyang anak padayong giateman sa hospital. Gibalhin lang kini sa pediatric ward pagka Nobiyembre 4, 2009.

Tuod man, klarong di siya makabayad sa bayranan. Wa sab siyay mga yuta nga mahimong collateral nga gipangayo sa tagdumala sa hospital.

Nisamot ang iyang problema kay ang hospital nipahamtang og tres porsyento nga interes sa principal nga amount.

Di pa gyud i-discharge ang bata aron lang unta maundang ang pagdugang sa bayranan matag adlaw nga naa ang bata sa hospital.

Imbes tabangan unta kini si Farro sa rason nga humanitarian, giduot na man hinuon sa hospital pinaagi sa pagbutang og interes sa bayranan nga nagsige pagtubo kay di sab nila buhian ang bata.

Ang inahan nga naglisod na daan, ila pa gyud nga pug-an.

Di kita mohisgot sa mga legal nga punto kabahin sa padayong desisyon sa hospital nga di buhian ang bata.

Ang ato na lang kay nagpakita karon ang maong hospital nga bayranan ra gyud diay ang ilang giapas ug di ang kaayuhan sa ilang pasyente.