BISAN kon wa pay kasiguroan kon madayon ba gyud ang barangay election karong Oktubre, ang regional director sa Commission on Election (Comelec) niingon nga kon kini madayon di gyud kini ma-automate.
Si Dir. Rene Buac, kinsa nibalik na sa Comelec-7 sugod kagahapon, niingon nga dako og gasto kon himuong automation ang eleksyon sa barangay kay nagpasabot kini nga matag barangay dunay ibutang nga mga makina nga duna ray pito ka mga konsehal ug usa ka kapitan nga pilian.
Alang kang Buac mas makadaginot kon mano-mano lang ang eleksyon.
Di usab mahimong gamiton kadtong wa nagamit nga mga flash card sa niaging national election kay di kini igo sa tanang barangay lukop nasod.
Si Buac nga nagsilbi sa niaging eleksyon sa Iloilo nihulagway sa niaging poll automation nga malampuson.
Apan iyang giangkon nga duna gyuy gagmay'ng mga kakulian ug kini masabtan ra gumikan kay unang higayon pa man gipahigayon ang poll automation.
"It was a successful election in so far as automation is concerned but when we say successful we do not mean perfect," pasabot ni Buac, kinsa ni-asumir og balik sa Comelec-7 kagahapon.
Nasayran nga gi-reshuffle ang mga regional director sa Comelec usa ka semana sa wa pa ang eleksyon ug matod ni Buac nga ni-signify na silang mobalik sa ilang karaang puwesto pinaagi sa pagpadala sa ilang intention didto sa ilang head office.
Kon wa may feedback nga madawat gikan sa kaulohan, matod ni Buac kini nagpasabot nga hingpit na gyud silang mobalik sa naandang pwesto.
Sa pag-asumir ni Buac, matod niya nga wa silay nadawat bisag usa ka election protest. Hinuon napupos na ang tagal alang sa pagduso og election protest nga napulo lang ka adlaw human sa eleksyon.