BODYGUARD. Kaniadto pa unta giundang ang paghatag og pulis nga bodyguard sa mga pulitiko tungod kay kuwang man ang atong kapulisan aron pagserbisyo sa katawhan ug kalinaw sa atong kumonidad.

Ang pag-ihap ug pagpabalik karon sa mga pulis nga bodyguard sa mga pulitiko sa ilang pwesto basi sa mando sa kahitas-an sa PNP mogawas nga gipanimaslan si Consolacion Mayor Avelino Gungog.

Sun.Star accepts donations for victims of Typhoon Ondoy

Atong mahinumduman nga giputlan ni Mayor Gungob sa suga ug telepono ang opisina sa pulis sa Consolacion tungod kay nasuko siya nga gikuhaan siyag bodyguard nga pulis.

Ang nakaparat sa atong mga pulitiko kay gihimo man nila og pribadong bodyguard ang atong pulis. Ang atong pulis gisuweldohan di aron himuong gwardiya sa mga pulitiko apan aron pagproteher sa katawhan ug kalikupan.

Ang gibuhat ni Mayor Gungob dili maayo. Kini supak sa balaod ingon man sa maayong pamatasan. Angayan nga pasakaan og sumbong si Mayor Gungob sa iyang binuhatan nga di mao.

Si Gungob ngan nga pinili sa katawhan magpakita og hustong pamatasan o hiyas. Di kay iyang ipakita sa katawhan nga poderoso siya. Ang mayor alagad sa lungsod ug sa katawhan di kay abusahan ang poder.

Nahikalimot man is Gungob nga mayor man lang siya. Abi tingali niyag siya na ang hari sa Consolacion kay ang tanan niyang gusto iya man ipatuman. Mayor Gungob ayaw kalimot nga kutob na lang ka sunod tuig.

Kinahanglan ipadayon ni PRO-7 Chief Lani-o Nerez ang pagpasakag sumbong administratibo batok ni Gungob aron paghatag ehemplo sa ubang piniling opisyal aron di mag-abuso sa ilang katungod ug opisina.

Sa ubang nasud, sama sa Australia, ang mga piniling opisyal way bodyguard nga pulis. Gani ang kadaghanan sila ra ang momaneho sa ilang sakyanan nga moadto ug moatender sa mga kalihukang publiko.

Bisan gani sa Amerika, ang mga pulis wa gihimong mga bodyguard sa mga pulitiko kay duna may ahensiya ang kagamhanan nga maoy mobantay sa mga dagkong opisyales sama sa presidente.

***

MODAGAN. Di igong rason nga mobiya si Bise Gob. Greg Sanchez sa “One Cebu Party” tungod kay ang iyang kontras pulitika sa Tuburan gipasulod ni Gob. Gwen Garcia sa iyang partido.

Matud pas mga taho si Bise Gobernador Sanchez nangluod kay wa siya konsultaha sa maong isyu. Matud pa niya gipatiran siya. Karon ka lang nahigmata Bise Gobernador Sanchez?

Angay nimong mahibaw-an Bise Gobernador Sanchez nga wa na kay pus sa partido ni Gobernador Garcia. Kadtong imong kontras pulitika sa Tuburan maoy dunay ikatampo sa sunod piliay maong gipatiran na lang ka.

Tungod niini, lanog kaayo ang hungihong nga modagan pagka gobernador si Sanchez batok ni Gobernador Gwen. Bisa tuod wa pa si Sanchez mosulti apan ang iyang lihok klaro na nga modagan siya batok ni Garcia.

Ang mga bata-bata usab ni Sanchez mipasabot na sa ilang mga higala sa medya nga si Sanchez modagan gyud batok ni Garcia.

Apan ang dakong pangutana kinsay kapyotan ni Sanchez nga partido?

Si Sanchez midaug pagka bise gobernador sa unang niyang dagan sud sa partido ni Bogo Mayor Junie Martinez diin si Martinez gipildi ni Garcia pagka gobernador.

Sa dihang bise gobernador na si Sanchez nakig-abin siya sa partido ni Gobernador Garcia og midaug siya sa iyang pagpasubli ngan bise gobernador ni Garcia.

Karon morag ilo si Sanchez kon walay mokuhang partido ug mopadagan kaniya nga gobernador batok ni Garcia. Maayo pa tingali nga iyang ipadayon ang iyang giplanohang mobalik siya sa iyang negosyo.

(ele_freezone@yahoo.com)