Espinoza: Iparehab si Joavan
Monday, February 8, 2010
More Sections
CROSS. Si Joavan ang cross ni Talisay City Mayor Soc Fernandez. Unsa kahay kasal-anan ni Mayor Soc nga gihatagan man siyag daghang problema sa iyang anak nga si Joavan?
Si Joavan na headline na usab tungod kay iyang giwarawarahan sa iyang pistola ang magtiayon nga nagmotorsiklo nga hapit madasmagi sa iyang sakyanan niadtong kadlawon sa Sabado imbis nga iyang tabangan. Mao ni bag-ong kontrobersiya ni Joavan human siya makagawas sa karsel tungod sa mga kasong kriminal nga iyang giatubang. Pagkaluoy ni Mayor Soc. Nagkaduol na ra ba ang piliay.
Have something to report? Tell us in text, photos or videos.
Click here for stories and updates on the Sinulog 2010 Festival.
Hinuon si Joavan di na minor de edad. Gani mahimo nang pasagdan ni Mayor Soc si Joavan tungod kay hingkod na siya sa pangidaron. Apan di sad nato mabasol si Mayor Soc tungod lagi kay amahan man siya.
Tungod sa maong hitabo, ang mga kaalyado ug kontra ni Mayor Soc sa pulitika nitambag kaniya nga iparehab og balik si Joavan aron magmalinawon ang dakbayan sa Talisay ingon man libre usab sa kuyaw ang katawhan.
Amahan man usab ko pero di ko makadawat sa mga dautang binuhatan ni Joavan. Nanghinubra na si Joavan. Iya nang giabusohan ang kaayo sa iyang amahan ug inahan. Hinaut nga mahigmata na si Mayor Soc sa kamatuoran nga si Joavan maoy nakahugaw sa iyang ngan ug dungog. Gawas nga mayor si Soc, usa siya sa mga maayong debatero sa Catholic Faith Defender.
Mayor Soc usa ra gyud ka pamaagi nga magmalinawon ang imong konsensiya ug mahalikay sa gubot ang mga Talisaynon sa kaabusado ni Joavan, isulod intawon og balik si Joavan sa rehab.
Moabot unya ang panahon Mayor Soc nga makaengkwentro si Joavan og armado basig magmahay na unya ka sa ulahiay.
Gibalhin ni Henry Biñas, ang hepe sa Talisay city pulis, sila SPO1 Elmer Saladas, PO2 Riolito Tano ug PO1 Manolito Daal tungod kay wa nila girekisa si Joavan bisag gisultian sila nga duna siyay dalang pusil.
Ang kaso sa tulo ka pulis sa trapiko sa Talisay maoy usa ka leksyon sa atong kapulisan nga way gipiling tawo ang atong balaod. Ang tanan angay ug patas atubangan sa atong sa balaod.
***
MALAMPUSON. Matud pa sa taho, malampuson ang giingon nga trial election niadtong Sabado sa Barangay Bulacao ug Barangay Mabini, usa sa mga barangay nga nahimutang sa kabukiran.
Ang 50 ka botante nga nisuway og gamit sa bag-ong balota ug sa automated counting machine nahimuot ug nalipay nga sayon ra ang proseso sa piliay karon Mayo.
Matud pa, nawala ang ilang kabalaka ug kakuyaw nga dili unya maapil og ihap ang ilang boto sa ilang piniling kandidato. Tungod sa kasayon, nakadani sa atong katawhan ang umaabot nga piliay sa Mayo 10.
Maayo unta to kon gipahibawo ang publiko kinsay nidaug sa pagka kongresista batok nila Mayor Tomas Osmeña ug Atan Guardo bisan kon dili tinuoray kadtong maong piliay.
Pagka dako kahang gubot no? Kon pananglitan nigawas ang estorya nga napildi si Mayor Tomas ni Atan sa mock poll, akong tan-aw makmakon ni Mayor Tomas ang proseso sa piliay nga sayop ang makina. Sa akong tan-aw, mokiha na usab si Mayor Tomas sa dyaryo nga nagpagawas sa resulta sa mock poll, apil na niini ang taga Comelec ug ang nagsulat sa balita. Gikihag libelo man gani ni Mayor Tomas ang Sun.Star Daily-Cebu, editor-in-chief Cheking Seares, ang reporter ug si Atan sa isyu nga gipugngan sa barangay tanod ang pagpanghatag og hinabang ni Atan ngadto sa nasunogan sa Calamba. Kana pa kahang balita nga napilde siya sa mock polls?
