Espinoza: Kinsa ang taga Ombudsman nga kaestorya ni Mendoza?
Monday, September 6, 2010
More Sections
NAWALA? Pagkadakong binuang nga ang cell phone nga gigamit sa hostage-taker, nga si kanhi Inspector Rolando Mendoza, nahatag, matod pa sa pulis, sa kagamhanan sa Hong Kong kay abi nila og gipanag-iya sa usa sa mga hostages nga nalibre sa pinusilay.
Ang cell phone nga gigamit ni kanhi Mendoza sa negosasyon sa pulis makahatag unta og katin-awan kon kinsa ang iyang kaestorya sa Ombudsman nga nangayog P150,000 aron lang madismis ang kasong iyang giatubang.
Have something to report? Tell us in text, photos or videos.
Updates on President Benigno Aquino III's presidency
Dako kog pagduda nga gituyo og wagtang ang cellphone nga gigamit ni Mendoza atol sa negosasyon sa pulis ug sa taga Om-budsman aron pagtabon sa estoryang makauuwaw nga gipangilkilan pa si Mendoza og P150,000 niadtong higayon sa krisis.
Morag di katuhoan ang testimonya ni Assistant hostage-negotiator Chief Inspector Romeo Salvador atubangan sa incident investigation and review committee (IIRC) nga gipangulohan ni Justice Secretary Leila de Lima nga gihatag ang cell phone ngadto sa mga otoridad sa Hong Kong.
Bisan pa kon nagtuo ang kapulisan nga gipanag-iya ang cell phone sa usa sa mga hostages, ang maong cell phone kabahin pa sa ebidensya sa krimen nga angayan untang hipusan sa pulis hangtod mahuman ang imbestigasyon.
Ang cellphone ni Mendoza usa ka importanting ebidensya nga angayan untang hipusan sa mga imbestigador sa kapulisan. Mora man og gibuangan ang mga pulis sa IIRC nga nag-imbestigar sa maong hitabo.
Pareha ra ni sa estorya nga si Presidente Noy wa pahibaw-a sa kapulisan sa mga panghitabo samtang gi-hostage ni Mendoza ang usa ka bus nga gisakyan sa mga turistang taga Hong Kong.
Ang imbestigasyon nga gipatigayon sa IIRC mogawas lang gihapon nga way makab-ot tungod kay ang kadagkoan sa kapulisan morag dunay intensyon sa pagtabon sa katiwarian sa Ombudsman.
Asoy pa ni Salvador sa IIRC nga iyang nadunggan si Mendoza nga nakig-estorya sa cell phone og taga Ombudsman nga matod pa nangayog P150,000 aron lang madismis ang kaso ni Mendoza.
“Humihingi ka pa ng P150,000 para sa kaso ko, P…I… ka, kung may mamamatay dito kasalanan mo ito,” ang asoy ni Salvador sa IIRC basi sa iyang nadunggan sa pakig-estorya ni Mendoza sa cell phone ngadto sa taga Ombudsman.
Angayan nga masayran sa IIRC kon kinsa nga taga Ombudsman ang nakaestorya ni Mendoza samtang ginegosyar sa kapulisan nga mabuhian ang mg turistang hostages aron mapasakaan og sumbong.
Susmaryosep! Pagkagrabe ning tawhana nga giingon nga taga Ombuds-man nga duna pay nawong mangayo og P150,000 kang Mendoza aron lang ma-dismiss ang iyang kaso samtang ang kinabuhi sa mga hostages nakataya na.
Kinahanglan awhagon sa IIRC ang kagamhanan sa Hong Kong aron mahibalik ang cell phone nga gigamit ni Mendoza aron pag-ila sa tawong gikaestorya ni Mendoza nga matud pa taga Ombudsman.
Ang IIRC mahimong moawhag usab sa mga kompaniya sa cell phone aron pagdeterminar kon kang kinsa tong numero sa cell phone ang gika-estorya ni Mendoza nga nangayog P150,000 aron ma-dismiss ang iyang kaso.
Kadtong tawo nga matod pa taga Ombudsman nga na-estorya ni Mendoza sa cell phone sa panahon sa negosasyon aron mabuhian unta ang mga turistang taga Hong Kong maoy nahimong pabilo sa kasuko ni Mendoza.
Di lang tangtangon sa serbisyo ning tawhana, pasakaan pa gyud og kaso aron paghatag og hustisya sa mga biktima ni Mendoza og agig ehemplo sa katawhan nga sama niya kaitom og kasingkasing nga ang gihunahuna kwarta ug dili ang kasiguroan sa kinabuhi sa mga hostages.
