Espinoza: Lubong ni Cerge; kalendaryo

Monday, January 25, 2010

ANDAM. Si kanhi Press Sec. Cerge Remonde nakapangandam na sa iyang pagpanaw niadtong Enero 19. Usa sa mga hiyas nga makaingon tang pung senyales mao ang iyang pagdeboto kang Señor Sto. Niño ug ang iyang kasuod ni Cardinal Vidal.

Nakahatag usab siya og scholarship sa 200 ka estudyanteng kabus sa Cebu Technological University sa Argao, ang iyang lungsod nga natawhan. Kini ug uban pang mga talagsaon ug dalaygong mga buhat ni Cerge nagpasabot nga iyang gipangandaman ang iyang kalagnong kaluwasan.

Have something to report? Tell us in text, photos or videos.

Click here for stories and updates on the Sinulog 2010 Festival.

Si Cerge sa buhi pa, nakahibawo kon unsa kalisod ang kinabuhi sa estudyanteng kabus. Pareha ming Cerge kaniadto nag-antos ug naningkamot makahuman og eskuyla aron makahaw-as sa tumang kalisud.

Bisan tuod wa ko mahatagi og pabor (kay wa man sad ko mangayo) samtang didto pa siya sa Malakanyang apan dako nakong kalipay ug garbo nga ang akong higala, kauban kaniadto sa UV, ug kauban sa prensa, natudlong press secretary.

Niadtong Dominggo, di masulod sa simbahan sa St. Michael sa Argao ang mga tawong nitambong sa misa sa katapusang oras ni Cerge dinhis yuta dayon og lubong didto sa menteryo tupad sa nitso sa iyang mama.

Si Presidente Gloria Arroyo, Bise Pres. Noli de Castro, mga miyembro sa kabinete, mga kongresista ug mga opisyales sa Capitol ug kalungsoran mitambong sa misa ug paglubong kang Cerge. Wa magkuwang ang katapusang adlaw ni Cerge.

Akong asawa, si Dr. Malou, nga higala usab ni Cerge kay nag-abot pa mi sa UV, si Dominic, among anak, ug ako bisan sa kalayo sa Argao niduyog mi sa simbahan ug nihatod sa lubong agig pagrespeto ug pagmahal sa among higalang Cerge.

Ang hinanaling kamatayon ni Cerge usa ka leksyon kanatong tanan kabahin sa atong panglawas ug sa sobrang trabaho. Dul-an lang sa usa ka tuig ang pagka press secretary ni Cerge gikan sa iyang pagkatudlo hangtud niadtong Enero 19.

Cerge, nakahibawo kong malipayon ka sa imong pagpanaw tungod kay imong nakab-ot ug nakompleto ang imong mga pangandoy sa kinabuhi nga mobiya ka ning kalibutan nga dunay ibilin nga pangan.

Sa imong pagka Cerge Remonde, nahimo kang pabilo sa kahayag sa mga tawong imong natabangan, labina sa mga estudyante, ug sa imong mga amigo. Sulondon ka higalang Cerge.

Kami, ang akong pamilya ug imong mga amigo, manghinaot ug mangaliya nga malinawon ang imong pagpanaw ug pagbalik ngadto sa atong labawng Makagagahom ug Magbubuhat.

Sa laing bahin, ang labing salawayon nga akong nakita human sa lubong ni Cerge mao ang pagpanghatag og mga kalendaryo sa mga kandidato. Ang mga tawo nga gikan mohatod sa lubong ni Cerge nagkagubot sa dalan aron mahatagan sa kalendaryo.

Hinuon di nato mabasol ang mga kandidato tungod kay nagduda ko nga ang nanghatag ang ila rang mga bata-bata. Gani di ko makatuo nga buhaton to sa mga lider sa kandidato nga mangampanya atol sa lubong ni Cerge.

Sa kadaghan sa mga tawo (ang kadaghanan taga Argao) nga nihatod ni Cerge, ang mga lider sa mga kandidato natental og pangampanya pinaagi sa panghatag og kalendaryo nga naay hulagway sa ilang kandidato.

Way mahimo ang Comelec dihang dapita tungod kay ang gipanghatag kalendaryo man lang nga dunay hulagway sa kandidato. Usa sa mga nahatagan og kalendaryo nikomentaryo ug daling niingon: “sus si kuan man diay ni” nga dag pangyamiid.