Elias L. Espinoza
Nagpakabana

IULI. Human sa testimonyo ni Abogado Trannie Ferrer sa Department of Environment and Natural Resources (DENR) niadtong Biyernes ang provincial board naghunahuna nga iresindo ang palit sa yuta ni Balili.

Matud pa ni Ferrer, 90 porsento sa yuta ni Balili nga gipalit sa kapitolyo timberland ug naa ilawom sa dagat.

For updates from around the country, follow Sun.Star on Twitter

Ang angayan ra untang bayran sa kapitolyo ang kadtong mga singko ektarayas nga yuta ni Balili nga wa mag-umog sa dagat.

Ako na ning gisugyot kaniadto sa mga opisyales sa kapitolyo human nabulgar ang maong isyu apan di sila kasupak sa gusto ni Gob Gwen Garcia nga ipadayon ang palit tungod ilang buhaton nga puerto ang maong dapit.

Hinuon ang maong plano ni Bise Gob. Greg Sanchez ug sa ubang bokal nga iuli ang palit wa pa ni mahibaw-i ni Gob. Gwen tungod kay didto man siya sa South Korea niadtong Biyernes.

Tungod kay timberland man ang kadaghanan sa yuta nga napalit sa kapitolyo, kon mauli ang palit wa nay gasto ang kapitolyo unya tungod kay ila na lang nga aplayan sa DENR nga ilang gamiton sa ilang proyekto.

Apan ang dakong pangutana karon kon naa pa ba ang kwarta nga gibayad sa kapitolyo ngadto ni Balili. Unsa may unya iuli ni Balili ngadto sa kapitolyo kon ang bayad nahurot nag bahin-bahin ug nagasto na?

Maayo ang sugyot ni Bise Gobernador Sanchez nga mag-uliay na lang sa palit aron maundang ang maong isyu ug malimpyo pa ang ilang dungog.

Apan mosugot ba kaha si Gobernador Gwen nga ang kapitolyo nakadawat na man og US$600,000.00 nga pasiunang bayad sa Kepco aron adto ilabay sa Balili fishpond ang coal ash gikan sa planta sa suga?

Sa laing bahin, si Engr. Anthony Sususco, provincial assessor, mibalitok sa iyang gisulti kaniadto nga iyang gihatagan sa kopya sa mapa sa yuta ni Balili si Bokal Juan Bolo atol sa iyang testimonyo sa imbestigasyon nga gipatigayon sa kapitolyo.

Si Bokal Bolo mireklamo na usab nganong siya ang gibasol sa tanan sa bolilyaso sa pagpalit sa yuta ni Balili nga, matud pa niya, gisugo ra man siya ni gobernadora.

Kon kinsa ang nagsulti sa tinuod sa nagpalibut nga mga isyu sap alit sa yuta ni Balili atong mahibaw-an unya sa tubag ni Gobernador Gwen.

***

KIT-KIT. Klaro kaayo nga nagkaduol na ang piliay kay gisugdan na og kit-kit si Bise Mayor Carlo Fortuna, sa dakbayan sa Mandaue, sa iyang kontra sa pulitika sa isyu nga midawat siya sa transportation allowance bisag duna siyay sakyanan nga libre.

Si Banilad Barangay Capt. Glen Bercede ang mopasakag sumbong ni Bise Mayor Fortuna sa Ombudsman tungod kay matud pa nagdawat siyag transportation allowance bisag gihatagan na siyag libreng sakyanan.

Atong mahinumduman nga si Bercede ug Fortuna mga suod kaayong amigo nga nagkuyog pa silang mga konsehal kaniadto sa administrasyon ni Mayor Teddy Ouano.

Sa miaging piliay, napilde ni Fortuna si Bercede sa pagka bise mayor. Si Bercede midagan nga bise mayor ni Mayor Jonas Cortes samtang si Fortuna bise mayor ni Jonkie Ouano, nga napilde ni Mayor Cortes.

Wa pa gyud mahuman ang away-pulitika ni Bercede ug Fortuna bisan kon haduol na ang sunod nga piliay. Hinuon di angayan maguol si Fortuna kay abogado man siya.

Kining kaso batok ni Fortuna mao na si sugod sa labayay sa hugaw unya sa oposisyon ug administrasyo ni Mayor Cortes. Gani gibasol ni Fortuna si Mayor Cortes nga wa niya gi-aprob ang badyet sa gasolina alang sa konseho.