Elias L. Espinoza
Nagpakabana

IKA 15. Gi-ablihan niadtong Dominggo ang pagselebrar sa ika-15 nga Press FreedomWeek ning tuiga. Si Cardinal Vidal mismo ang nagmisa sa pagsugod sa selebrasyon didto sa Trades Hall sa SM.

Si Cardinal Vidal sa iyang wali mipahimangno sa medya sa ilang responsabilidad sa komunidad ug sa pagpatigbabaw sa kamatuoran.

Ingon pa ni Cardinal nga likayan unta ang “cut throat competition” sa medya.

For updates from around the country, follow Sun.Star on Twitter

Ang buot ipasabut ni Cardinal Vidal nga ang kamatuoran masakrispisyo tungod sa kumpetisyon. Ang radyo ug TV mag-indigay kinsay numero uno tungod sa gitawag nga “ratings game”.

Ang medya, ma radyo, TV o pamantalaan, dunay dakung responsabilidad sa pagbutyag sa kamatuoran alang sa kasayuran sa atong katilingban.

Tungod sa atong medya, ang mga hiwing binuhatan sa mga opisyales (pinili o tinudlo) sa kagam-hanan atong mahibaw-an. Gani mao ni basihan sa Ombudsman pagpasakag sumbong batok sa mga dautan o kurakot nga mga opisyales.

Di nato ikalimod nga duna say mga kauban natos medya nga mga salawayon labina kadtong atong gitawag nga mga “kumedya”. Kana bang way klarong gitrabahoan nga medya.

Ang pagselebrar sa Press Freedom Week usa ka pagpahinumdum sa atong katilingban ug sa kagamhanan nga kaming taga medya nagpakabana alang sa kasayuran ug kaayuhan sa tanan.

Ang “press freedom week” gimugna ug gisugdan niadtong tuig 1994 ni Atty. Cheking Seares, editor-in-chief sa SunStar Daily, ug mga kauban aron pagpalig-on ug hatag fuerza sa atong medya dinhis dakbayan.

Niadtong tuig 1994 pipila pa lang kalugas nga miyembro dinhis medya nga miduyog ning maong selebrasyon. Apan karon ug sa nangaging tuig nag-anam og kadaghan ug kahimsog ang selebrasyon.

Apan kaming naas medya way pus ug di makahatag og matuod nga balita ug saysay kon ang atong katilingban di sad magpakabana labina kadong mga tawo nga dunay kasayuran sa kamatuoran.

Alang sa kalamboan sa atong medya dinhis dakbayan ug sa kaayohan sa tanan, kinahanglan nga dunay kadasig ug way kahadlok ang atong kaigsoonan sa pagsumbong sa mga sayop o hiwing binuhatan sa atong mga opisyales.

****

LAYO RA. Dili ni pagsaway sa atong dakbayan sa Sugbo apan kon atong ikumparar sa dakbayan sa Tagbilaran haskang laayo ra bahin sa kalimpyo ug kahusay.

Nagdako lang ang hambog ug yawyaw si Mayor Tomas Osmeña apan ang iyang dakbayan haskang hugawa na ug gubota labina sa trapiko ug daghang dautan nga dalan.

Si Tagbilaran city Mayor Dan Neri Lim nga hilum kaayo og binuhatan apan kita ang iyang maayong agi. Ang mga taga Tagbilaran o bisan mga bisita mo-respeto sa mga ordinansa ug di magpasagad og hugaw-hugaw.

Ang drayber sa sakyanan ug traysikol sa Tagbilaran mga but-an ug mosubay sa lagda sa trapiko di sama sa atong mga drayber dinhis Sugbo labina sa traysikol nga haskang badlongona.

Ang mga traysikol drabyer sa dakbayan sa Lapu-Lapu, Mandaue ug Talisay sama sa kalungsoran sa Minglanilla, Naga hangtod sa Carcar grabe ka abusado. Kon badlongon mao pay masuko.

Unsa may nakalahi sa Tagbilaran ug sa dakbayan sa Sugbo? Matud pa sa drayber sa van, nga akong gisakyan niadtong Huwebes sa Tagbilaran, strikto ang implementasyon sa balaod trapiko ug ang mga pulitiko di moapil sa trabaho sa pulis.

Ang tanan nga mogamit sa kadalanan sa Tagbilaran nakabenipisyo sa kalimpyo ug kahusay sa ilang trapiko. Dinhis ato mas daghan ang kusog magpaugat sa kadalanan kay sa mosubay sa lagda sa trapiko.